Sputnik.KZ дереккөзінен алынған мәліметтерге сүйене отырып, Qazaq24.com түсініктеме жасады..
АСТАНА, 14 сәуір – Sputnik. Таяу Шығыстағы қақтығыстың созылуы және жаһандық экономикадағы қолайсыздық 2026 жылы Еуропа мен Азияда мұнай бағасының екі есеге, ал газ бағасының үш есеге өсуіне әкеп соқтыруы мүмкін. Бұл туралы Халықаралық валюта қоры (ХВҚ) ескертті.
"Ең күрделі сценарий кезінде шикізат тауарлары бағасына түсетін қысым күштірек болады әрі ұзаққа созылады. Бұл ретте мұнай бағасы 2026 жылдың екінші тоқсанынан бастап 2026 жылғы қаңтардағы базалық болжаммен салыстырғанда 100%-ға өседі", – делінген ұйым жариялаған есепте.
Осылайша, Халықаралық валюта қоры 2026 жылы мұнайдың орташа бағасы барреліне шамамен 110 доллар, ал 2027 жылы шамамен 125 доллар болуы мүмкін екенін жоққа шығармайды.
Сонымен қатар, ХВҚ есептеуінше, осы кезеңде Еуропа мен Азияда газ бағасы 200%-ға өседі. Ал азық-түлік бағасы 2026 жылы 5%-ға, 2027 жылы 10%-ға қымбаттайды.
Ал неғұрлым жеңіл сценарий бойынша, 2026 жылы мұнай бағасы шамамен 20%-ға өсіп, барреліне 82,22 долларға жетуі мүмкін, ал 2027 жылы 75,97 долларға дейін төмендейді.