Qazaq24.com, Sputnik.KZ дереккөзінен алынған ақпаратқа сүйене отырып жаңалық таратады..
АСТАНА, 20 қазан – Sputnik. Халықаралық азаматтық авиация ұйымының (ИКАО) бас хатшысы Хуан Карлос Саласар Астанаға алғаш рет ресми сапармен келді, деп хабарлады Көлік министрлігі.
Бұл сапар Хуан Карлос Саласардың Орталық Азия елдеріне жасаған алғашқы сапары болды.
"Сапар аясында ИКАО басшысы 20-22 қазанда Астанада өтетін ИКАО-ның Авиациялық қауіпсіздік апталығына (ICAO Security Week 2026) қатысады", - деп жазылған хабарламада.
Қазақстан алғаш рет авиациялық билік органдарының басшыларын, халықаралық ұйымдардың өкілдерін, әуе компаниялар мен әуежайлардың өкілдерін, сондай-ақ саладағы жетекші сарапшыларды біріктіретін осындай ауқымды халықаралық іс-шараны қабылдап отыр.
"ИКАО-ның Авиациялық қауіпсіздік апталығының Қазақстанда өткізілуі және ұйымның Бас хатшысының ресми сапары халықаралық авиация қоғамдастығының елімізге деген жоғары сенімін, Қазақстанның авиациялық қауіпсіздікті қамтамасыз ету саласындағы жетістіктерінің мойындалуын және әлемдік авиациядағы ұстанымының нығайып келе жатқанын көрсетеді", - деп атап өтті ведомство.
Іс-шара жаһандық авиациялық қауіпсіздік жүйесін нығайтуға және заманауи қауіп-қатерлерге қарсы іс-қимылдың бірлескен тәсілдерін әзірлеуге қосымша серпін береді деп жоспарланып отыр.
ИКАО – Біріккен Ұлттар Ұйымының мамандандырылған мекемесі. Ұйымға 193 мемлекет мүше. ИКАО азаматтық авиация саласындағы халықаралық стандарттар мен ұсынылатын тәжірибені әзірлейді.
Қазақстан ИКАО-ға 1992 жылдан бері мүше. 2024 жылы Қазақстан Орталық Азия елдерінің арасында бірінші болып Монреаль қаласында ИКАО жанындағы тұрақты өкілдігін ашты.