Sputnik.KZ парақшасындағы деректерге сәйкес, Qazaq24.com ақпарат таратты..
АСТАНА, 18 қыркүйек – Sputnik. Көкшетауда гүл бизнесіне қатысты алаяқтық ісі тергеліп жатыр. Қазірдің өзінде 17 адам жәбірленуші ретінде танылған. Келтірілген шығын көлемі 44 миллион теңгеден асады, деп хабарлады Ақмола облысының полиция департаменті.
Полиция мәліметінше, 2025 жылы 36 жастағы әйел тендерге қатысуға көмектесемін деген сылтаумен азаматтардан ақша жинаған. Ол бұл үшін таныстарына да, бейтаныс адамдарға да хабарласқан.
Әйел алған қаражатты белгілі бір пайызбен қайтаруға уәде берген. Алайда кейін өз міндеттемелерін орындамаған. Мәселен, жәбірленушілердің бірі оған 4,7 миллион теңге берген. Бірақ уәде етілген ақша қайтарылмаған. Тергеу барысында мұндай тендердің болмағаны анықталды. Ал алынған қаражат жеке қажеттіліктеріне жұмсалған.
"Қазіргі таңда іс бойынша 17 жәбірленуші анықталды. Жалпы келтірілген материалдық шығын 44 миллион теңгеден асып отыр", - деп жазылған хабарламада.
Полиция алаяқтықтан зардап шеккендердің саны әлі де артуы мүмкін екенін атап өтті.