“Конвертке қанша салу керек?“ Қазақстандықтарды үйлену тойына шақыру таңғалдырды

Желіде ерекше той шақыруы қызу талқыға түсті. Қонақтардан тойға баласыз келу сұралып, ақшалай сыйлықтың ең төменгі мөлшері бір адамға 15 мың теңге деп көрсетілген. Бірі мұндай шарттарды әдепсіздік деп санаса, енді бірі бұдан ешқандай оғаштық көріп тұрған жоқ. Tengri Life той ұйымдастырушысынан қазіргі уақытта тойға орташа есеппен қанша теңге апаратынын және қонақтар өз орнының шығынын "жабуға" міндетті ме екенін сұрап білді.

"Баласыз" және "15 мыңнан бастап": шақыру қағазында не жазылған?

Әлеуметтік желіде бұл шақырумен тойға шақырылғандардың бірі бөліссе керек. Онда ұйымдастырушылар әрбір қонақтың емін-еркін демалуы үшін тойға баласыз келуін өтінген.

Сонымен қатар олар ақшалай сыйлықтың ең төменгі мөлшерін бір адамға 15 мың теңге деп нақты көрсеткен.

"Қонақтар назарына: Әрбір мейманның еркін демалуын тілеп, тойымызды балаларсыз өткізуді ұйғардық. Түсіністікпен қарайды деп сенеміз!

Құрметті қонақтар! Егер ақ тілектеріңізді ақшалай сыйлықпен білдіруді жөн көрсеңіздер, бір адамға 15 000 теңгеден бастап сыйлағандарыңызға ризашылығымызды білдіреміз", - делінген шақыру қағазында.

Дәл осы нақты соманы көрсету туралы өтініш көп пікірталас тудырды.

Скриншот: Threads

Желі қолданушыларының көбі тойдың баласыз өтуіне таңғалмайтынын жеткізді. Ал қонақтарға сыйлық мөлшерін алдын ала бекітіп беруді орынсыз деп санайды.

"Балаларға қатысты түсінікті, бірақ сыйлықтың сомасын нақтылау әдепсіздік: адамдардың жағдайы әртүрлі болуы мүмкін. Тойдың мәні оны ақтауда емес. Егер қаражат жетпесе, той жасамай-ақ қойған немесе аз адам шақырған дұрыс", - деп атап өтті пікір қалдырушылардың бірі.

Тағы бір қолданушы баласыз той жасауды жақсы идея деп атаса, ақша туралы өтінішті "қате" деп бағалады.

Сонымен қатар пікір қалдырушылардың бір бөлігі жас жұбайларды жақтап шықты. Олар кейбір қонақтардың үлкен топпен келіп, азғантай ақша салып, мол дастарқаннан дәмелі болатынын еске салды.

"Жоқ, бәрі дұрыс! Шамасы, 10 мың теңге салып, ит-құсына дейін ертіп келетін, әрі бір тайдың етін жеп кететіндер оларды әбден шаршатқан болуы керек! Олардың қандай ортада жүргенін білмейміз, сондықтан сырттай кінәлау дұрыс емес шығар. Ал балалар туралы алдын ала ескерткені дұрыс болған", - деп жазды желі қолданушысы.

Талқылауға қатысушылардың тағы бірі қазіргі уақытта банкет құны өте жоғары екенін, сондықтан қонақтар ең болмағанда өз орнының шығынын ескеруі керектігін айтты.

Біз Алматыдағы премиум-сегменттегі нысандармен жұмыс істейтін той ұйымдастырушысы Айзада Әбілдемен тілдестік.

Оның айтуынша, мұндай мекемелерде банкет құны орташа есеппен бір адамға 70 мың теңгеден басталуы мүмкін. Бұл ретте тіпті қымбат тойдың өзі сыйлықтар есебінен ақталуы міндетті емес.

"Менің тәжірибемде, дәулетті адамдар тойды қонақтардың ақшалай сыйлығымен бюджетін жабамын деген мақсатпен жасамайды. Әркімнің мүмкіндігі әртүрлі. Иә, мұндай тойларда әдетте қомақты сома сыйға тартылады, бірақ бұл той шығынын толық өтейді деп сенудің қажеті жоқ. Жалпы алғанда, той ешқашан дерлік өзін-өзі ақтамайды", деді ол.

Ал қарапайым тойларға келетін болсақ, Айзаданың сөзінше, қазір банкет құны бір адамға шамамен 20 мың теңгеден басталып, шағын қалаларда 25–30 мың теңгеге дейін барады. Бұл тек мәзірдің құны оған асаба, залды жалдау, бағдарлама және өзге де шығындар кірмейді.

Сондықтан ұйымдастырушы сыйлық ретінде 30–40 мың теңгені бейресми бағдар ретінде атайды.

"Егер туыс-туғандарымыз бен достарымыз өткізетін кәдімгі тойлар туралы айтсақ, меніңше, бүгінде 20 мың теңге ең төменгі сома. Тіпті шағын қалалардың өзінде бір қонаққа шаққандағы банкет құны 25–30 мың теңге болуы мүмкін, бұл тек мәзір ғана. Оған зал, асаба, шоу-бағдарлама мен басқа да шығындарды қоспағанның өзінде", - деп атап өтті ол.

Ұйымдастырушының пікірінше, жас жұбайларға да, қонақтарға да тойды қаржылық есеп-қисапқа айналдырудың қажеті жоқ.

Айзада болашақ ерлі-зайыптыға мүмкіндіктерін алдын ала бағамдап, мереке үшін үлкен несие алмауға кеңес береді. Шағын тойдың өзі әдемі әрі есте қаларлықтай өтуі мүмкін.

Сондай-ақ ол қонақтарға сыйлық үшін қарызға батпауды ұсынады. Өйткені шығындар тек конвертпен шектелмеуі мүмкін: егер адам басқа қаладан келсе, жол ақысы мен жатын жайына ақша төлеуі керек. Бұған қоса киім-кешек, аяқ киім, макияж және басқа да дайындықтарға қосымша шығын кетеді.

Сондықтан ұйымдастырушы 30–40 мың теңгені міндетті сома емес, тек бағдар ретінде қабылдаған жөн деп санайды.

"Меніңше, 30–40 мың теңге көлеміндегі сома бүгінгі заман талабына толықтай сай келеді. Жақын достар мен туыстарға 50 мың теңгеден бастап сыйлауға болады. Бірақ бұл міндетті ереже емес, тек бейресми бағдар ғана. Қалай болғанда да, әркім өз бюджетінің мүмкіндігіне қарай беруі керек", - деді той ұйымдастырушысы.

Ал тойға балалармен келу-келмеу мәселесін жас жұбайлардың өздері шешеді. Ең бастысы бұл туралы қонақтарға алдын ала ескерту.

Google News арқылы жаңалықтарымызды қадағалаңыз