LRT, театрлар мен стадиондар Ұлттық қордың қаражаты неге жұмсалады

Қазақстан Үкіметі былтыр бас тартқан Ұлттық қордан берілетін нысаналы трансфертті қайтарды. Бұл қаражат не үшін қажет болғанын премьер-министрдің орынбасары – ұлттық экономика министрі Серік Жұманғарин айтып берді, деп хабарлайды Tengrinews.kz тілшісі.

Нысаналы және кепілдендірілген трансферттер: айырмашылығы неде?

Қазақстанның 2027 жылға арналған бюджетінде Ұлттық қордан трансферттің екі түрі қарастырылған: 2,4 триллион теңге кепілдендірілген және 2 триллион теңге нысаналы трансферт.

Анықтама: Ұлттық қор – бұл мұнай, газ және басқа да пайдалы қазбаларды сатудан түсетін ақша жинақталатын мемлекеттік қор. Қорды Қазақстан Ұлттық банкі басқарады.

Осыдан бір жыл бұрын Үкімет нысаналы трансферттерден бас тарту ниеті туралы мәлімдеген болатын. Алайда 2027 жылға арналған бюджетте олар қайта қарастырылды.

Анықтама:Трансферттер - бұл белгілі бір қажеттіліктерге аударылатын қаражат. Бюджет шығыстарын жабуға, соның ішінде әлеуметтік міндеттемелерді орындауға жыл сайын бөлінетін кепілдендірілген трансферттер, сондай-ақ нақты міндеттерге бөлінетін нысаналы трансферттер болады.

Серік Жұманғарин қазір Үкімет Ұлттық қор қаражатын пайдалану тәсілін өзгертіп жатқанын айтты.

"Биыл және келесі жылы Ұлттық қор қаражатын пайдаланудың жаңа логикасы қалыптасады – бұл қаржылық капиталды ұлттық капиталдың өзге формасына көшіру", – деді вице-премьер.

Ұлттық қор қаражатын пайдалану қажеттілігі ауруханалар, мектептер, театрлар мен спорт кешендері сияқты әлеуметтік маңызы бар нысандарды тезірек салуға көмектесетінімен негізделеді. Бұл ретте аталған нысандарды ондаған жылдар бойы күтудің қажеті болмайды.

"Бұл нысандарды Ұлттық қор қаражатына тиіспей, 10 жыл ішінде салуға болар еді. Бірақ оларды екі жылда салып, халық игілігіне қазір беруге болады", – деп түсіндірді ол.

Ұлттық қор қаражаты қайда жұмсалады?

Серік Жұманғариннің айтуынша, Инфрақұрылымдық даму қоры арқылы жалпы құны 5,7 триллион теңге болатын 483 жоба мақұлданды. 2026 жылы қаржыландыруға 1,5 триллион теңге бағыттау ұсынылды.

Ауруханалар мен медициналық орталықтар

Денсаулық сақтау саласына 422 миллиард теңгенің 61 жобасы тиесілі. Олардың қатарында 10 перинаталдық орталық пен перзентхана, 20 аурухана, 12 емхана, 5 жедел жәрдем орталығы, сондай-ақ Астана, Алматы және Өскемендегі ірі медициналық нысандар бар.

Мектептер мен балабақшалар

Білім беру саласына құны 225 миллиард теңге болатын 61 жоба тиесілі. Атап айтқанда, 41 мектеп пен лицей, 12 мектепке дейінгі ұйым және Астанада көпфункционалды кешен салу жоспарланып отыр. Жұманғарин құрылыс қажеттілігін халық санының жедел өсуімен байланыстырды.

Театрлар мен концерт залдары

Мәдениет саласына 12 жобаны жүзеге асыру үшін 100,6 миллиард теңге бөлінеді. Олардың ішінде Қызылордадағы 35 миллиард теңгелік драма театр, Атыраудағы 21 миллиард теңгелік облыстық мұрағаты бар Бейбітшілік пен келісім сарайы және Тараздағы 1 300 орындық 18,5 миллиард теңгелік концерт залы бар.

Спорт нысандары

34 спорттық жобаға 240 миллиард теңге қарастырылған. Олардың қатарында Петропавлдағы 12 мың орындық стадион, спорттық арена мен мұз кешені, сондай-ақ Қостанайды қоса басқа да қалалардағы спорт сарайлары бар.

LRT, метро және басқа да инфрақұрылымдық жобалар

Көлік саласына жалпы құны 2,2 триллион теңге болатын 133 жоба тиесілі. Жұманғарин ірі нысандар қатарында мыналарды атап өтті:

Астанадағы LRT-ның екінші кезегі; Алматыдағы метрополитеннің үшінші кезегі.

Бұған дейін Үкімет отырысында Қаржы министрлігі 2027 жылға арналған республикалық бюджет жобасын таныстырды. Мемлекет қазынасына қанша қаражат түсіп, қанша ақша жұмсалатынын және негізгі шығыстар қандай бағыттарға бөлінетінін мына жерден оқыңыз.

Бізді Google-дың негізгі дереккөздер тізіміне қосыңыз

Қосу