Tengrinews.KZ парақшасынан алынған деректерге сүйене отырып, Qazaq24.com хабарлама жасады..
Петропавл полицейлері әлеуметтік желіге клип түсіру барысында жол қозғалысы ережесінің бірнеше тармағын бұзған екі блогер қызға айыппұл салды, деп хабарлайды Tengri Auto.
Әлеуметтік желілерде жергілікті блогерлер Serebro тобының танымал "Мама Люба, давай, давай" клипін қайталаған видео таратқан. Жүргізуші мен жолаушы көлік ішінде билеп, беттеріне маска жасаған, бұл ретте жолаушы қауіпсіздік белдігін тақпаған, көлік қозғалып бара жатқанда терезеден шығып, жүргізуші орынына ауысып отырған және болып жатқан жайтты видеоға түсірген.
Instagram-дағы бұл жарияланымды көру
Пікір қалдырушылардың бірі көлікте қауіпсіздік белдігінсіз жүруге болмайтындықтан, бұл видеоны полиция қызметкерлеріне жіберу керектігін жазған. Бұған блогер арандатушылықпен полицейлерді белгілеп қоюды сұрап, "олар бізге өте қажет" деп жауап берген. Видео астына біреу полицейлерді шынымен белгіледі ме, әлде тәртіп сақшылары ережебұзушылардың ролигін өздері көрді ме, ол жағы белгісіз, бірақ полиция видео авторларын анықтап, оларға айыппұл салды.
"21 шілдеде Петропавл - Есіл тас жолында Changan Deepal S07 автокөлігінің 36 жастағы жүргізушісі мен 42 жастағы жолаушысы Жол қозғалысы ережелерінің талаптарын бұза отырып, әлеуметтік желіге видео түсірген. Анықталған фактілер бойынша әкімшілік материалдар толтырылып, көлік жүргізушісі мен жолаушысы әкімшілік жауапкершілікке тартылды, қатысушылармен профилактикалық әңгіме жүргізілді", - деп хабарлады Tengrinews.kz тілшісіне облыстық полиция департаменті баспасөз қызметі.
Жүргізуші жолаушыларды тасымалдау талаптарын бұзғаны үшін, ал жолаушы көлік қозғалысы кезінде салоннан тыс жерде болғаны үшін жауапқа тартылды.
Анықтама: Айта кетейік, Әкімшілік кодекстің 593-бабы 1-2-бөлігіне сәйкес, жолаушылар мен жүктерді тасымалдау ережелерін сақтамау 5 АЕК (21 625 теңге) көлемінде айыппұл салуға әкеп соғады. Жолаушыға Әкімшілік кодекстің 615-бабы 5-бөлігі (көлік құралы қозғалысы кезінде жолаушының кабинадан (салоннан) тыс жерде болуы) бойынша 10 АЕК, яғни 43 250 теңге көлемінде айыппұл салынды.
Бұдан бөлек, жақында полицейлер Kia Rio автокөлігін ас үйге айналдырған тағы бір блогерлерді - жүргізуші мен жолаушыны әкімшілік жауапкершілікке тартты. Көлік қозғалып бара жатқанда блогер люктен шығып, көлік төбесінде суши дайындаған.
"Петропавлда Универсальная көшесінде Kia Rio автокөлігінің 29 жастағы жүргізушісі мен оның 22 жастағы жолаушысы көлік қозғалысы кезінде Жол қозғалысы ережелерін бұзып, әлеуметтік желіге бейнеролик түсіргені анықталды. Анықталған ережебұзушылықтар бойынша әкімшілік материалдар толтырылып, қатысушылармен профилактикалық әңгіме жүргізілді", - деп түйіндеді СҚО ПД.
Облыстық полиция департаменті әсерлі бейнеконтент жасауға ұмтылу жол қозғалысына қатысушылардың өмірі мен денсаулығына қауіп төндірмеуі керек екенін еске салды.
Бұған дейін Петропавлда блогер көлікпен сағатына 150 шақырымға дейін жылдамдықты арттырғанын видеоға түсіріп, жариялағанын жазған болатынбыз. Тексеруден кейін полицейлер оған қатысты әкімшілік хаттама толтырды. Оған 20 АЕК (86 500 теңге) көлемінде айыппұл салынды.
Google News арқылы жаңалықтарымызды қадағалаңыз
Жазылу