Qazaq24.com, Egemen.KZ дереккөзінен алынған ақпаратқа сүйене отырып мәлімет бөліседі..
Бенилюкс елдері туризм саласындағы жаңа бағыттар қатарында Маңғыстау өңіріне ерекше назар аударып отыр. Жақында Нидерланд пен Бельгияның беделді басылымдары елімізді шетелдік саяхатшыларға тартымды мекен ретінде таныстырды. Жарияланымдарда Маңғыстау облысының экспедициялық әлеуеті мен қайталанбас табиғи ландшафты жан-жақты сипатталған.
Атап айтқанда, Нидерланд Корольдігінің «Travel Book» журналына Маңғыстау облысы мен Астана қаласы туралы арнайы мақала жариялады. Әсіресе Қызылқұп шатқалының ғажайып көрінісі журналдың жаңа санының негізгі визуалды сәніне айналған. Мақалада Бозжыра, Торыш, Қызылқұп шатқалдарының сұлулығына баса мән берілген. Басылым Нидерланд пен Бельгия аумағына кеңінен таралады.
Мақала авторы өз саяхатынан алған әсерін былайша жеткізеді: «Маңғыстауды Марс немесе Ай бедерімен жиі салыстыратыны бекер емес. Мұндағы пейзаждар айрықша әсер қалдырады. Ешнәрсеге ұқсамайтын бірегей ландшафттың қақ ортасында тұрғанда таңданысыңды жасыра алмайсың. Ең ғажайып орындары – Бозжыра, Қызылқұп, Торыш. Бозжыра алқабында шатқалдар, тау шыңдары мен жартастар аппақ түске бөленсе, «Тирамису таулары» аталып кеткен Қызылқұп, керісінше, қызғылт, қызыл, терракота реңктерімен көз тартады. Ал «Шарлар алқабындағы» (Торыш) пішіні мінсіз дөңгелек мыңдаған тасты көру – тіпті бір ғанибет».
Сонымен қатар Бельгияның «Papillio» лайфстайл-басылымы да оқырмандарына Маңғыстауды сирек кездесетін ландшафты бар тартымды бағыт ретінде ұсынды. Таралымы шамамен 280 мың дананы құрайтын журнал ел табиғатының бірегейлігін паш еткен. Өңір туралы бейнелі ақпараттар мен фоторепортаждар сарабдал саяхатшыларды біріктіретін халықаралық «She Is Not Lost» платформасында да жарияланды.