Qazaq24.com, Azh.KZ дереккөзінен алынған мәліметтерге сүйене отырып ақпарат жариялайды..
«Ескерту ме, тексеру ме: Атырауда көтерілген экологиялық мәселе Мәжіліске жетті» атты мақала жарияланғаннан кейін «Маңғыстаумұнайгаз» АҚ баспасөз қызметі депутаттың компанияға қатысты айтқан пікірін теріске шығарған ресми хабарлама жолдады.
Баспасөз хабарламасында былай делінген:
«2026 жылғы 28 мамырда ҚР Парламенті Мәжілісінің пленарлық отырысында кәсіпкерлік субъектілеріне қатысты экологиялық тексерулердің нәтижелерін формалды процессуалдық себептермен жою мәселесі талқыланған кезде депутат А.Т. Құспан мысал ретінде 2024 жылы «Маңғыстаумұнайгаз» АҚ‑на Каспий теңізіне қалдық төкті деген айыппен 32 млрд теңге көлемінде айыппұл салынғанын, кейін бұл шешім Жоғарғы сотта процессуалдық бұзушылықтарға байланысты (тексеру туралы хабарлама болмағандықтан) жойылғанын айтты.
Бұл ақпарат шындыққа және істің нақты мән-жайына сәйкес келмейді.
2024 жылы Маңғыстау облысы прокуратурасының тексерісі нәтижесінде «Маңғыстаумұнайгаз» АҚ‑на 30,9 млрд теңге көлемінде айыппұл салынған. Айыппұлдың себебі — Волга суын қабаттарға жіберу және бұрғылау қалдықтарын экологиялық рұқсатсыз жинақтау деп көрсетілген.
Алайда сот барысында бұл су өндірістік технологиялық мақсатта, қабат қысымын ұстап тұру үшін пайдаланылғаны, ол ағынды су ретінде жер қойнауына жіберілмегені, қалдықтардың жинақталмағаны, бірден арнайы ұйымға утилизацияға берілгені анықталды.
Сондықтан әкімшілік құқық бұзушылық құрамы болмағандықтан іс тоқтатылып, айыппұл компанияға қайтарылды.
«Маңғыстаумұнайгаз» АҚ өз қызметін экологиялық заңнама талаптарына және әлеуметтік жауапкершілік қағидаттарына сай жүзеге асырады».
Бүгін, 20:23