Qazaq24.com, Sputnik.KZ дереккөзінен алынған мәліметтерге сүйене отырып ақпарат бөліседі..
АСТАНА, 19 тамыз – Sputnik. Ресей Қазақстан мұнайын Балтық теңізіндегі Усть-Луга портынан Қара теңіздегі Новороссийск портына қайта бағыттап жатыр деген ақпарат әлеуметтік желіде және кейбір БАҚ-та тарады.
Қазақстанның Энергетика министрлігі Sputnik Қазақстан тілшісіне осы ақпаратқа қатысты түсініктеме берді.
"Қазақстан Республикасының Энергетика министрлігі Ресей тарапынан Қазақстан мұнайын Усть-Луга портынан Новороссийск портына қайта бағыттау туралы шешім қабылданғаны жөнінде ресми ақпарат алған жоқ. Сонымен қатар министрлік Қазақстан мұнайын барлық бағыт бойынша, оның ішінде Усть-Луга және Новороссийск порттары арқылы тасымалдау мен экспорттау жағдайына тұрақты мониторинг жүргізіп отыр", - делінген хабарламада.
Сондай-ақ ведомство Қазақстан мұнайының бірнеше бағыт бойынша экспортталатынын атап өтті. Бұл жекелеген бағыттардағы қазіргі жағдайды ескере отырып, экспорттық жеткізілімдерді икемді ұйымдастыруға мүмкіндік береді.
"Министрлік Қазақстан мұнайын жеткізудің тұрақтылығын қамтамасыз ету мәселелері бойынша Ресей тарапымен және тасымалдауға қатысушылармен өзара іс-қимылды жалғастырып жатыр", - деп мәлімдеді Энергетика министрлігі.