Qazaq24.com, Sputnik.KZ дереккөзінен алынған ақпаратқа сүйене отырып мәлімет бөліседі..
АСТАНА, 13 мамыр – Sputnik. Қазақстандық саясаттанушы Әділ Кәукенов "Валдай" клубының VI Орталық Азия конференциясында Ресейдің жоғары білімі Орталық Азия өңіріндегі гуманитарлық ықпалдастықтың негізгі арналарының бірі екенін айтты.
Ол "Үлкен Еуразияның" гуманитарлық негізі бүгінде нақты сипатқа ие болғанын, ал өңір елдері дербес әрі тәуелсіз білім беру кеңістігін қалыптастыруға ұмтылып отырғанын атап өтті.
"Қазіргі әлемде білім беру саласындағы бәсекелестік жаһандық сипатқа ие. Сондықтан тиімді шешімдердің бірі — халықаралық деңгейде мойындалған білім беру орталықтарымен ынтымақтастық орнатып, оларды жергілікті ортаға бейімдеу.
Мәселен, ресейлік білім беру ықпалы туралы айтатын болсақ, бүгінде Қазақстанда Ресейдің жетекші жоғары оқу орындары филиалдарының ауқымды желісі қалыптасты. Олардың қатарында Ломоносов атындағы ММУ, ҒЗҚИ, Губкин атындағы Ресей мұнай және газ университеті және тағы басқалары бар", — деді ол.
Оның пікірінше, бұл Ресейдің жоғары білімі өңірдегі гуманитарлық ықпалдастықтың маңызды арналарының бірі болып қала беретінін айқын көрсетеді.