Inform.KZ парақшасындағы ақпаратқа сәйкес, Qazaq24.com хабар таратты..
- Министрлік отандық тауар өндірушілер (ОТӨ) өнімдерінің сауда желілерінің сөрелерінде ұсынылуына талдау жүргізді. Талдау әлеуметтік маңызы бар азық-түлік тауарларының (ӘМАТ) 31 атауы бойынша жүргізілді. Талдау нәтижесінде (биылғы 6 ақпандағы жағдай бойынша) мыналар анықталды: Қазақстанда өндірілген тауарлардың үлесі 83%-ды құрады. Бұл ретте, Ресей Федерациясы өнімінің үлесі – 11,5%, Беларусь Республикасы өнімінің үлесі – 1,9%, Украина өнімінің үлесі – 0,55%, Қырғызстан өнімінің үлесі – 0,45%, АҚШ өнімінің үлесі – 0,01%, ал өзге елдер өнімінің үлесі 2,59%-ды құрайды, - делінген министрліктің Kazinform агенттігіне берген жауабында.
Отандық өнімнің неғұрлым жоғары үлесі мынадай тауар позициялары бойынша байқалды: пияз – 100%, бірінші сұрыпты бидай ұнынан пісірілген нан – 99,7%, сәбіз – 97%, тауық жұмыртқасы – 95%, картоп – 94%, бірінші сұрыпты бидай ұны – 94,3%,балық – 93,3%, сүйексіз сиыр еті – 92,5%, ет фаршы – 91,2%.
- Ет, сүт және көкөніс өнімдерінің басым бөлігі бойынша отандық тауарлардың үлесі 70–90 пайыздан асады, бұл ішкі өндірістің және ішкі нарықты қамтамасыз етудің жеткілікті деңгейін көрсетеді, - деп аталып өткен ведомство ақпаратында.
Айта кетейік, жақында Мемлекет басшысы отандық өндірістің өсуіне қолайлы жағдай жасауды тапсырды.