Qazaq24.com, Sputnik.KZ дереккөзінен алынған мәліметтерге сүйене отырып мәлімдеме жасады..
АСТАНА, 6 қараша – Sputnik. Қазақстандық өндірушілер елде өндірілетін 183 тауардың 83-і бойынша импорттың үлесін азайтты, деп хабарлады Energyprom.kz.
Ұлттық статистика бюросының мәліметінше, 2026 жылдың қаңтар-тамыз айларында осы тауарлардың импорты 2023 жылдың сәйкес кезеңімен салыстырғанда төмендеген. Ал 51 тауар бойынша импорт көлемінің үлесі артса, 49 тауарда айтарлықтай өзгеріс болмаған.
"Импорттың үлесі керамикалық плитка, теледидар, мыс сым және асүй жиһазы бойынша айтарлықтай қысқарған. Керісінше, дәретхана қағазы, қант, металл конструкциялар, шоколад және кондитерлік өнімдер бойынша импортқа тәуелділік артқан", - деп жазды портал.
Импортты алмастыру үдерісі керамикалық плитка өндірісінен анық байқалады. 2026 жылдың сегіз айында оның импорт үлесі 78,7%-дан 48,6%-ға дейін төмендеген. Осы кезеңде отандық өндірушілер 12 млн шаршы метр плитка шығарған. Бұл 2023 жылмен салыстырғанда 2,4 есе көп. Ал импорт көлемі 18,1 млн шаршы метрден 11,3 млн шаршы метрге дейін азайған. Осылайша, 2026 жылы алғаш рет отандық плитка өндірісі импорт көлемінен асып түсті.
Сондай-ақ асүй жиһазы бойынша импорт үлесі 33,9%-дан 23%-ға, матрастар бойынша 45%-дан 37,9%-ға төмендеген. Мыс сым импортының үлесі де 16,9%-дан 3,8%-ға дейін қысқарған.
Азық-түлік өнеркәсібінде де оң өзгерістер бар. Шұжық өнімдері бойынша импорт үлесі 40%-дан 33%-ға дейін азайған. Ірімшік пен сүзбе бойынша көрсеткіш 43,3%-дан 40,8%-ға төмендеген. Алайда шырындар мен ас тұзы бойынша импорт үлесі айтарлықтай өзгермеген.
"Автомобиль өндірісі де өскен. 2026 жылдың қаңтар-тамыз айларында Қазақстанда 117,2 мың жеңіл автокөлік шығарылған. Бұл өткен жылдың сәйкес кезеңінен 34,2%-ға көп. Импорт көлемінің қысқаруы нәтижесінде елдегі автокөлік ресурстарындағы импорт үлесі 49,8%-ға дейін төмендеген", - дейді мамандар.
Теледидар өндірісі бір жылда 2,7 есе өсіп, 146,7 мың данаға жетті. Соған қарамастан, импорттың үлесі әлі де жоғары – 83,9%. Ал кір жуғыш машиналар өндірісі 2026 жылы 49,4 мың данаға жетіп, тауар ресурстарының 10,6%-ын құраған.
Сонымен қатар бірқатар тауар бойынша импортқа тәуелділік күшейген. Атап айтқанда, дәретхана қағазының импорт үлесі 41,9%-дан 61,5%-ға өскен. Оны өндіру көлемі 21 мың тоннадан 17,6 мың тоннаға дейін қысқарса, импорт 15,1 мың тоннадан 28,2 мың тоннаға дейін артқан.
Қант импортының үлесі де 61,2%-дан 77,7%-ға жеткен. Отандық өндіріс 133,8 мың тоннадан 81,4 мың тоннаға дейін азайған. Ал металл конструкциялары бойынша импорт үлесі 48,9%-дан 63,8%-ға, шоколад пен кондитерлік өнімдер бойынша 52%-дан 61,1%-ға өскен.