Qazaq24.com, Aikyn.KZ дереккөзінен алынған мәліметтерге сүйене отырып мәлімдеме жасады..
Басқосудың негізгі мақсаты – отбасы институтын нығайту, зорлық-зомбылықтың алдын алу және қоғамда мейірімділік пен өзара сыйластық мәдениетін қалыптастыру.
Жиынға «AMANAT» партиясы Шымкент қалалық филиалы атқарушы хатшысының орынбасары Ербол Байқонысов, Президент жанындағы Әйелдер істері және отбасылық-демографиялық саясат жөніндегі ұлттық комиссияның мүшесі, «Отбасы мәселелері және халықты әлеуметтік қорғау» жөніндегі аймақтық кеңестің төрайымы Баян Жандосова, сондай-ақ Полиция департаменті Отбасылық-тұрмыстық зорлық-зомбылыққа қарсы күрес бөлімінің бастығы Жаңыл Спанова және жастар қауымы қатысты.
Іс-шара барысында отбасылық құндылықтар мен қоғамдағы зорлық-зомбылық мәселесіне арналған бейнероликтер көрсетіліп, колледж студенттері тәрбиелік мәні жоғары сахналық қойылымдар қойды. Сонымен қатар қатысушыларға әлеуметтік бағыттағы музыкалық нөмірлер ұсынылып, атмосфераны ерекше мәнермен толықтырды.
Жиында сөз алған Ербол Байқонысов отбасындағы береке мен татулықтың қоғам тұрақтылығы үшін айрықша маңызын атап өтті:
«Отбасы – әрбір азаматтың ғана емес, бүкіл қоғамның тірегі. Зорлық-зомбылықтың алдын алу – бір күннің шаруасы емес, бәрімізге ортақ міндет. Біз берекелі, мейірімді орта қалыптастырсақ, ертеңіміз де жарқын болады. «AMANAT» партиясы әрдайым осы бағыттағы бастамаларды қолдауды жалғастыра береді», – деді ол.
Сондай-ақ іс-шара барысында отбасы мәселелерімен белсенді айналысып жүрген және зорлық-зомбылықтың алдын алу бағытында табысты еңбек етіп жүрген бірқатар азамат арнайы алғысхаттармен марапатталды.
Елнар ЕЛТАЙ