“Өзге планеталықтар ма, әлде зымыран ба?“ Аспандағы жұмбақ жарық Қазақстан тұрғындарын таңғалдырды

23 қыркүйек күні кешке Ақтөбе облысының тұрғындары аспаннан ерекше шұғыланы байқады. Бірі зымыран десе, енді бірі өзге ғаламшарлықтар, тіпті суперқаһармандар туралы айта бастады. Tengri Life бұл құбылыстың нақты не екенін білу үшін Фесенков атындағы Астрофизика институтына хабарласты.

Әлеуметтік желідегі кадрларды Ақтөбе облысының тұрғындарының бірі бөлісті.

"23 қыркүйек, Ақтөбе облысы. Аспанда түсініксіз бірдеңе болып жатыр, бұл ешқандай фотошоп емес", - делінген видеоның сипаттамасында.

Видео желіде тез тарап, қызу талқыға салынды. Желі қолданушылары көргендеріне қатысты түрлі болжамдар ұсынды.

"Зымыран ұшып барады", "Көрдік, бірақ не екенін түсінбедік", "Бұл Марвел Капитанының ұшып келгені", "Бұл баяғы өзге ғаламшарлықтар ғой", - деп жазды желі қолданушылары.

Біз Фесенков атындағы Астрофизика институтының жетекші ғылыми қызметкері Александр Серебряныйға хабарластық. Ол бұл құбылыс кеше Қытайдың Хайнань провинциясындағы Вэньчан ғарыш айлағынан ұшырылған Long March-8A зымыран тасығышының сатылары бөлінуінің салдары болуы мүмкін екенін айтты.

"Бұл құбылыстың астрофизикаға ешқандай қатысы жоқ. Бұл, сірә, төмен жер маңы орбитасына (LEO) ұшырылған Long March-8A болуы әбден мүмкін. Ұшырылым Астана уақытымен 18:32-де орындалды, ал бірнеше сағаттан кейін сатылары бөлінді - видеоға түсіп қалған соның салдары болуы ықтимал", - деп түсіндірді сарапшы.

Бізді Google-дың негізгі дереккөздер тізіміне қосыңыз