Inform.KZ дереккөзінен алынған мәліметтерге сүйене отырып, Qazaq24.com түсініктеме жасады..
Пәкістанның сыртқы істер министрі Исхак Дардың айтуынша, тараптар арасындағы байланыс тікелей емес, хабар алмасу арқылы жүзеге асырылып жатыр. Бұған дейін Вашингтон Тегеранға 15 тармақтан тұратын ұсыныстар тізімін жолдаған, қазір оны Иран тарапы қарастыруда.
– Шын мәнінде АҚШ пен Иран арасындағы жанама келіссөздер Пәкістан арқылы жеткізілетін хабарламалар арқылы жүріп жатыр, – деді министр.
Оның айтуынша, делдалдық процесіне Түркия мен Мысыр да қосылған. Сонымен қатар бірқатар мемлекет келіссөздердің ілгерілеуіне қолдау көрсетіп отыр.
Бұл – Пәкістанның екі ел арасындағы дипломатиялық байланыста делдал рөлін атқарып отырғанын алғаш рет ресми түрде растауы.
Пәкістан премьер-министрі Шехбаз Шариф пен сыртқы істер министрлігі Иран билігімен, сондай-ақ Парсы шығанағы елдеріндегі одақтастармен, соның ішінде Сауд Арабиясымен тұрақты байланыс жүргізіп отыр. Дипломатиялық күш-жігерге елдің әскери басшылығы, соның ішінде армия басшысы Асим Мунир де қатысуда.
Ал Иранның сыртқы істер министрі Аббас Арагчи Вашингтонмен тікелей келіссөз жүргізіліп жатқанын жоққа шығарды. Дегенмен ол хабарламалар «достас елдер» арқылы жеткізіліп жатқанын растады және Тегеран өз ұстанымынан бас тартпайтынын айтты.
Мысырдың сыртқы істер министрі Бадр Абделати де Каирдің Түркия және Пәкістанмен бірге делдалдық процеске қатысып жатқанын мәлімдеді. Оның айтуынша, өңір елдері шиеленісті ушықтырмай, дипломатиялық жолмен шешуге мүдделі.
Парсы шығанағы араб мемлекеттері ынтымақтастық кеңесінің бас хатшысы Жасем әл-Будайви ұйымға мүше елдер АҚШ пен Иран арасындағы кез келген келіссөзге қатысуға мүдделі екенін айтты. Ол дипломатиялық шешімдерге басымдық берілетінін, бірақ мемлекеттердің өзін-өзі қорғау құқығы сақталатынын атап өтті.
Бұған дейін Иран АҚШ-тың соғысты тоқтату туралы жоспарынан бас тартқаны хабарланған.