Qazaq24.com, Inform.KZ дереккөзінен алынған мәліметтерге сүйене отырып ақпарат жариялайды..
Кантер пелотоннан жаппай спринтте командалық үйлесімді жұмыстың арқасында топ жарды. Қашықтықтың соңғы шақырымында оны алға нидерландтық шабандоз Майк Тениссен алып шықты. Нәтижесінде неміс спринтері мәре сызығын бірінші болып кесіп өтіп, Red Bull — BORA — hansgrohe командасының жаңа зеландиялық спортшысы Лоренс Пити мен Soudal Quick-Step командасының бельгиялық шабандозы Яспер Стейвеннен озып кетті.
Бұл Макс Кантердің Әлемдік тур жарыстарындағы алғашқы жеңісі болса, XDS Astana Team үшін 2026 жылғы маусымдағы осы деңгейдегі алғашқы жеңіс болды.
— Бұл жеңіс мен үшін арманның орындалуымен тең. «Париж–Ницца» — өте беделді жарыс, ал мұнда кезең ұту — керемет жетістік. Соңғы бірнеше апта мен үшін оңай болған жоқ, денсаулығымда қиындықтар болды. Осында келгенде өзімнің дайындығыма толық сенімді болмадым. Кеше бірінші кезеңде де жағдай аса көңіл көншітпеді. Бірақ жылдамдық сақталды, бүгін бәрі ойдағыдай болды, — деді Кантер команда баспасөз қызметіне берген пікірінде.
Спортшының айтуынша, ол кезең бойы барынша назарын сақтауға тырысқан. Алайда соңғы шақырымдар өте тартысты өткен, шамамен мәреге екі шақырым қалғанда команда бірнеше позициядан айырылған.
— Бірақ Майк Тениссен сабыр сақтап, мен оған сенім арттым. Ол мені алға тамаша алып шықты, соңғы километрді керемет өткізді және 200 метр қалғанда ыңғайлы орынға жеткізді. Одан кейін мен бар күшімді салдым, ешкім мені басып оза алмады. Бұл жеңіс маған үлкен сенім береді. Осындай жоғары деңгейде де жеңіске жетуге болатынын дәлелдеді. Командама алғыс айтқым келеді, бүгін жігіттер бар күшін салды, — деді Макс Кантер.
Айта кетейік, жарыстың екінші кезеңі Épone — Montargis бағыты бойынша өтіп, қашықтығы 187 шақырымды құрады. Алда спортшыларды тағы алты кезең күтіп тұр.
Бұған дейін XDS Astana Team командасының италиялық велошабандозы Кристиан Скарони «Оман туры» көпкүндік жарысының жеңімпазы атанған болатын.