Qazaq24.com, Aikyn.KZ дереккөзінен алынған мәліметтерге сүйене отырып ақпарат жариялайды..
Кеңес отырысында кәсіпкерлер «Өрлеу» жеңілдетілген қаржыландыру бағдарламасына қатысуға рұқсат алу, әлеуметтік маңызы бар маршруттарды субсидиялау, сондай-ақ сауда орындарына арналған жер учаскелерін бөлуге қатысты бірқатар мәселені көтерді. Атап айтқанда, индустриялық аймақта орналасқан Lucrum Star жауапкершілігі шектеулі серіктестігінің өкілі «Өрлеу» бағдарламасына қатысу барысында туындаған кедергілерге тоқталды.
– Кәсіпорын 2012 жылдан бері қағаз қалдықтарын қайта өңдеу арқылы дайын өнім шығарып келеді және барлық көрсеткіш бойынша шағын кәсіпкерлік субъектісі талаптарына сай. «Өрлеу» бағдарламасы аясында несиелендіруге өтінім берген едік. Алайда құрылтайшының бір адам болуы себепті рұқсат берілмей отыр, – деді компанияның даму бөлімінің басшысы Жанболат Айтенов.
– Кәсіпкерлердің мәселелерін осындай алаңдарда көтеріп, оларды нақты шешуге бағыт ұстануымыз қажет. Осы тұрғыда үйлестіру кеңесінің жұмысы маңызды. Қазіргі уақытта Салық кодексіне тиісті өзгерістер енгізіліп, Ақтөбе облысы бойынша қала мен аудандарда салық ставкалары төмендетілді. Бұл бюджетке оңай соқпаса да, қабылданған шешімдердің басты мақсаты – кәсіпкерлерді қолдау, – деді партияның облыстық филиалы төрағасы Ербол Данағұлов.
Облыс әкімінің орынбасары, кеңестің тең төрағасы Абзал Әбдікәрімов үйлестіру кеңесі кәсіпкерлікке қолайлы жағдай қалыптастырудағы маңызды алаң екенін жеткізді. Ол кеңес шеңберінде кәсіпкерлерді алаңдататын өзекті мәселелерді ашық талқылап, оларды шешуге бағытталған нақты шаралар қабылдауға болатынын атап өтті. Сондай-ақ кеңестің тең төрағасы кәсіпкерлікті қолдауға бағытталған жұмысты күшейту үшін барлық мүдделі тарапты бірлесіп әрекет етуге шақырды.