Qazaq24.com, Sputnik.KZ дереккөзінен алынған мәліметтерге сүйене отырып ақпарат жариялайды..
АСТАНА, 30 қаңтар - Sputnik. Павлодардың спорт мектептерінде ұрлық пен жалған төлемдер анықталды, деп хабарлайды облыстық прокуратура.
Прокуратура тарапынан өңірдегі спорт нысандарына тексерулер жүргізілді. Олардың қатарында стадиондар, бассейндер, спорт мектептері, мұз айдындары мен футбол манеждері бар.
"Спорттық құрылыстар заңсыз түрде жеке тұлғалардың иелігіне берілген. Бұл нысандар коммерциялық мақсатта пайдаланылып, жалдау ақысы төленбеген. Мысалы, Павлодар қаласында хоккей корты үш жыл бойы тегін пайдаланылып, ал коммуналдық шығындар бюджет қаражаты есебінен өтелген", - дейді прокуратура.
Спорт мектептерінің қызметінде 10 млн теңге сомасына ұрлық және жалған төлемдер фактілері анықталды.
"Бір ауданда бухгалтер үш жыл ішінде өзіне заңсыз түрде шамамен 6 млн теңге аударған. Іс сотта қаралуда", - дейді прокурорлар.
Спорт ұйымдарында жалған дипломдары бар жаттықтырушылар, сондай-ақ бұрын халық денсаулығына және имандылыққа қарсы қылмыстар үшін жауаптылықа тартылған қызметкерлердің жұмыс істегені анықталды. Спортшыларды жоқ қонақүйлерге орналастыру бойынша жалған шарттар жасалған. Салдарынан 2,8 млн теңге залал келген.
"Спорт нысандарының басым бөлігі тозған: трибуналар қирап, шатырлардың сынған. Мүгедектігі бар адамдарға жағдай жасалмаған. Санитарлық және өрт қауіпсіздігі талаптарына сәйкес келмейді ", - делінген хабарламада.