Петропавлда су басуы мүмкін саяжай аумақтарында кезекшілік ұйымдастырылды

«Қазгидромет» кәсіпорны Солтүстік Қазақстан облыстық филиалы ескерту жариялады. Гидрологтардың айтуынша, өткен тәулікте Петропавл маңында Есіл өзенінің су деңгейі 26 см-ге көтеріліп, 902 см-ге жетті. Қауіпті деңгейге 40 см қалды. Осы шекке жеткен жағдайда Есіл өзені арнасынан шығып тасиды, салдарынан саяжай учаскелерін және автожолды басу қаупі бар.

Осыған орай СҚО Төтенше жағдайлар қызметі мен облыстық полиция департаменті Есіл өзені жайылмасындағы саяжайларда бақылауды күшейтті. 

СҚО ТЖД мәліметінше, саяжай иелерімен алдын ала түсіндіру жұмыстары жүргізіліп, учаскеден уақытша кету қажеттігі ескертілді. Мұндай шаралар төтенше жағдайлардың алдын алу мақсатында жыл сайын жүзеге асырылады.

Сондай-ақ құтқарушылар мен полиция қызметкерлері күшейтілген режимге көшіп, тәулік бойы кезекшілік атқаратын бекеттер қойылды. Аумақ патрульденіп, дрондардың көмегімен жағдай бақылауға алынды.

Бұған дейін ҚР ТЖМ Ақмола, Солтүстік Қазақстан және Шығыс Қазақстан облыстарында қауіп сақталғанын мәлім еткенін жазған едік.