Qazaq24.com, Inform.KZ дереккөзінен алынған мәліметтерге сүйене отырып мәлімдеме жасады..
Қазақстан Республикасының заңнамасына сәйкес полиция қызметкерлеріне қатысты заңға қарсы әрекеттер үшін әкімшілік те, қылмыстық та жауапкершілік көзделген.
ҚР Қылмыстық кодексінің 378-бабы (Билік өкілін қорлау)
Полиция қызметкерін қызметтік міндеттерін атқару кезінде немесе оларды орындауына байланысты қорлау:
— 80 айлық есептік көрсеткішке (АЕК) дейін айыппұл салуға,
— не сол мөлшерде түзеу жұмыстарына,
— не 80 сағатқа дейін қоғамдық жұмыстарға,
— не 20 тәулікке дейін қамаққа алуға әкеп соғады.
Дәл сол әрекеттер көпшілік алдында, оның ішінде бұқаралық ақпарат құралдары, телекоммуникация желілері немесе онлайн-платформалар арқылы жасалса:
— 160 АЕК-ке дейін айыппұл салуға,
— не түзеу жұмыстарына,
— не 160 сағатқа дейін қоғамдық жұмыстарға,
— не 40 тәулікке дейін қамаққа алуға әкеп соғады.
ҚР Қылмыстық кодексінің 379-бабы (Билік өкіліне бағынбау)
Полиция қызметкерінің заңды талаптарына бағынбау, яғни оның заңды өкімдерін орындаудан бас тарту, оның ішінде төтенше жағдай кезінде жасалған болса:
— 2000 АЕК-ке дейін айыппұл салуға,
— не түзеу жұмыстарына,
— не 600 сағатқа дейін қоғамдық жұмыстарға,
— не 3 жылға дейін бас бостандығын шектеуге,
— не сол мерзімге бас бостандығынан айыруға әкеп соғады.
ҚР Қылмыстық кодексінің 380-бабы (Билік өкіліне қатысты қорқыту немесе күш қолдану)
Билік өкіліне немесе оның жақындарына қызметтік міндеттерін орындауына байланысты немесе сол үшін кек алу мақсатында өлтіремін деп қорқыту, денсаулыққа зиян келтіремін деп қорқыту, мүлкін бүлдіру немесе жою қаупін төндіру:
— 3 жылға дейін бас бостандығын шектеуге немесе бас бостандығынан айыруға әкеп соғады.
Өмірге немесе денсаулыққа қауіпті күш қолдану:
— 10 жылға дейін бас бостандығынан айыру жазасына әкеп соғады.
ҚР Әкімшілік құқық бұзушылық туралы кодексінің 667-бабы
Полиция қызметкерінің заңды талабына бағынбау, сондай-ақ оның заңды қызметіне араласу, оның ішінде былапыт сөздер айту, құрметсіздік таныту, әдепсіз мінез-құлық көрсету, арандату, тіл тигізіп тиісу, әдепсіз ишаралар немесе заттар көрсету, соның ішінде бұқаралық ақпарат құралдары мен телекоммуникация желілерін пайдалану арқылы жасалған әрекеттер:
— 30 АЕК мөлшерінде айыппұл салуға
немесе
— 15 тәулікке дейін әкімшілік қамаққа алуға әкеп соғады.
— Полиция қызметкерлерінің заңды қызметіне кедергі келтіруге бағытталған кез келген әрекет — қорлау, қорқыту, заңды талаптарға бағынбау немесе күш қолдану түрінде — қоғамдық тәртіпті бұзып, азаматтардың қауіпсіздігіне қауіп төндіреді және міндетті түрде жауапкершілікке әкеледі, оның ішінде бас бостандығынан айыру жазасына дейін. Абай облысы Полиция департаменті азаматтарды заң талаптарын сақтауға, құқықтық мәдениет танытып, билік өкілдеріне құрметпен қарауға шақырады. Бұл — қоғамдағы қауіпсіздік пен тұрақтылықты қамтамасыз етудің маңызды шарты, — деп ескертті тәртіп сақшылары.
Бұдан бұрын Атырауда полиция қызметкерлерін ұрғандарға қатысты қылмыстық іс қозғалғанын жазғанбыз.