Tengrinews.KZ парақшасындағы деректерге сәйкес, Qazaq24.com ақпарат таратты..
Құрылтайдың алғашқы сессиясында Мемлекет басшысы Қасым-Жомарт Тоқаев жаңа Парламенттің алдында тұрған маңызды міндеттерді айқындады, деп хабарлайды Tengrinews.kz тілшісі.
Президенттің айтуынша, басты міндеттердің бірі – жаңа Конституцияның ережелерін ескере отырып, ел заңнамасын жаңарту.
"Бірінші. Жаңа Конституция нормаларын ескере отырып, еліміздің заңнамасына түзетулер енгізу қажет. Жаңа конституциялық жүйеге өту барысында бұрынғы Парламент негізгі билік институттарының қызметін қамтамасыз ететін бірқатар маңызды заңдарды қабылдады. Енді Құрылтай әр салаға қатысты заңнаманы мұқият саралап, олардың Конституция қағидаттарына сай болуын қарауы керек", - деді Президент.
Екінші маңызды міндет ретінде Тоқаев заң шығару үдерісінің тұрақтылығы мен сапасын қамтамасыз етуді атады. Мемлекет басшысы бұған дейін бұл функцияны негізінен Мәжіліс қабылдаған заңдарды тексерген Сенат атқарып келгенін атап өтті.
"Құрылтай заң шығару үдерісінің тұрақтылығы мен сапасын қамтамасыз етуі керек. Бұған дейін Сенат Мәжіліс қабылдаған заңдардың Конституцияға сәйкестігін, құқықтық тұрғыдан дұрыстығын, нормалардың өзара үйлесімділігін тексеріп отырды. Бұл жұмысты жандандыру қажет", - деді Мемлекет басшысы.
Жұма, 28 тамызда Президент бірінші шақырылымдағы Құрылтайдың алғашқы сессиясын ашты. Бұған дейін Президент Құрылтайдың бірінші сессиясын шақыру туралы жарлыққа қол қойды.
Тағы оқыңыз: “Қазіргі заман құр уәденің уақыты емес“: Тоқаев Құрылтай депутаттарына үндеу жасады
1 шілдеден бастап Қазақстанда жаңа Конституция күшіне енді. Ол қабылданғаннан кейін Мәжіліс пен Сенат жұмысын тоқтатып, депутаттық өкілеттіктері де доғарылды. Екіпалаталы Парламенттің орнына бірпалаталы Құрылтай келді. Оның құрамына бес жылға сайланатын 145 депутат кіреді.
23 тамызда Қазақстанда Құрылтай депутаттарының алғашқы сайлауы өтті. Бұл 1991 жылдан бері елімізде өткен оныншы парламенттік сайлау және конституциялық реформадан кейінгі алғашқы науқан болды. Дауыс берудің қорытынды нәтижелерін мына жерден оқуға болады.
Сайлау қорытындысы бойынша Құрылтайға бес саяси партия өтті. Олардың арасында мандаттар келесідей бөлінді:
"Әділет" партиясы – 110 мандат; Жалпыұлттық социал-демократиялық партия (ЖСДП) – 8 мандат; "Ауыл" халықтық-демократиялық патриоттық партиясы – 10 мандат; "Ақ жол" Қазақстан демократиялық партиясы – 8 мандат; Respublica партиясы – 9 мандат.Тағы оқыңыз: Қазақстан Құрылтайына кімдер кірді: толық тізім
Кеше Орталық сайлау комиссиясы жаңа бірпалаталы Құрылтай депутаттарын тіркеді. Оларға куәліктер мен төсбелгілер табысталды.
Google News арқылы жаңалықтарымызды қадағалаңыз
Жазылу