Tengrinews.KZ парақшасынан алынған ақпаратқа сүйене отырып, Qazaq24.com хабарлама жасады..
Президент Sinovation Ventures және 01.ai компанияларының бас директоры Ли Кай-Фуды қабылдады, деп хабарлайды Tengrinews.kz Ақордаға сілтеме жасап.
Қасым-Жомарт Тоқаев Ли Кай-Фу сарапшы ретінде Қазақстанның жасанды интеллект пен цифрлық трансформацияны дамыту бағытындағы ұстанымдарын қалыптастыруға зор үлес қосқанын атап өтті.
Мемлекет басшысы Үкімет Ли Кай-Фудың ұсынымдарына және озық халықаралық тәжірибеге сүйене отырып, орта білім беру жүйесіне жасанды интеллектіні енгізу жобасын іске асыруға кіріскенін айтты.
Анықтама: Sinovation Ventures - 2009 жылы Google China компаниясының бұрынғы басшысы Кай-Фу Ли негізін қалаған қытайлық венчурлік компания. Қор жасанды интеллект, терең технологиялар, роботтандыру және тұтынушылық интернетке басымдық бере отырып, технологиялық стартаптарға ерте және аралық кезеңдерде инвестиция салуға маманданған. Sinovation Ventures басқаруында миллиардтаған доллар бар, ал оның портфелінде ондаған табысты технологиялық "жалғызмүйіздер" (unicorn) бар. 01.ai - 2023 жылғы мамырда сол Кай-Фу Ли негізін қалаған генеративті жасанды интеллект саласындағы стартап. Компания ашық және коммерциялық үлкен тілдік модельдерді (атап айтқанда, Yi модельдер тобын) және агенттік ЖИ саласындағы шешімдерді әзірлеумен айналысады. 01.ai іске қосылғаннан кейін небәрі алты ай ішінде "жалғызмүйіз" мәртебесіне ие болып, Қытай мен Азиядағы ЖИ нарығының жетекші ойыншыларының біріне айналды.
Ли Кай-Фу шағын жинақты мектептерге жасанды интеллектіні енгізу жобаларының негізгі параметрлері жөнінде мәлімдеді.
Пилоттық жоба бірінші кезеңде биыл қыркүйектен бастап, 10 мектепте жүзеге асырылады. 2027 жылдың қаңтарынан бастап оны 60 мектепке, ал сәуірде 500 мектепке енгізу жоспарланып отыр.
Президент жобаны іске асыруда оның ауқымын кеңейту және білім сапасын арттыратын нақты нәтижеге қол жеткізу маңызды екеніне тоқталды.
Жасанды интеллектінің игілігін қаланың да, ауылдың да тұрғындары теңдей көруі қажет екеніне баса мән берілді. Бұл ретте Мемлекет басшысы жасанды интеллектіні кәсіпкерлікті дамытудың бір тетігі ретінде пайдалану перспективасына назар аударды.
Кездесуде Мемлекет басшысына жасанды интеллект және цифрлық трансформация саласындағы бірқатар бастама таныстырылды.
Еске сала кетейік, бүгін Ақордада Президент Қасым-Жомарт Тоқаевтың төрағалығымен Жасанды интеллектіні дамыту жөніндегі кеңестің үшінші отырысы өтіп, онда өнеркәсіп секторын терең цифрлық трансформациялау мәселесі қаралды. Мемлекет басшысы өз сөзінде жасанды интеллект жаңа цифрлық дәуірде бәсекеге қабілеттіліктің негізгі факторларының біріне қарқынды түрде айналып жатқанын атап өтті.
Бізді Google-дың негізгі дереккөздер тізіміне қосыңыз
Қосу