Tengrinews.KZ парақшасындағы деректерге сәйкес, Qazaq24.com ақпарат таратты..
Павлодардағы емханалардың бірінде медициналық қызметтерді қосып жазу дерегі бойынша іс тергеліп жатыр. Дәрігерлер қабылдауға қайтыс болған адамдарды жазса, гинекологтар ер адамдарды "емдеген", деп хабарлайды Tengrinews.kz тілшісі.
Өңірлік экономикалық тергеп-тексеру департаменті басшысының міндетін атқарушы Ғалиасқар Қасымов МӘМС және кепілдендірілген тегін медициналық көмек көлемі аясында қаржы алу үшін медициналық қызмет көрсету туралы жалған мәліметтер енгізу дерегі бойынша ЖШС басшылығына қатысты сотқа дейінгі тергеу жүріп жатқанын хабарлады. Оның мәліметінше, емханадағы қосып жазу деректері 2023 және 2024 жылдар аралығында анықталған.
"Бұл ЖШС мемлекеттен кепілдендірілген медициналық көмек алу үшін азаматтарды тізімге қосып жазумен айналысқан. Яғни, медициналық көмекті қайтыс болғандар алды деп көрсетілген, гинеколог ер адамдарға көмек көрсеткен, сондай-ақ бұл емханаға тіркелмеген азаматтарға қызмет көрсетілген жағдайлар бар", - деді брифинг барысында Қасымов.
Шығынның алдын ала көлемі 15 миллион теңгеден асты.
"Әзірге ешкім күдікті деп танылған жоқ. Қазір қатысы бар адамдар тобын – басшылықты, дәрігерлерді тексеріп жатырмыз. Ол жерде осы емханадан қандай да бір қызмет алған адамдардың саны өте көп. Сондықтан әзірге істің толықтығы қамтамасыз етіліп жатыр", - деді өңірлік экономикалық тергеп-тексеру департаменті басшысының міндетін атқарушы Ғалиасқар Қасымов.
Ол тергеу амалдары жалғасып жатқанын және өзге ақпарат тергеу мүддесіне байланысты жария етілмейтінін айтты.
Биыл көктемде павлодарлық прокурорлар Әлеуметтік медициналық сақтандыру қорының (ӘМСҚ) бюджет қаражаты мен активтерінің жұмсалуын тексере келе, жалған медициналық қызмет көрсетудің көптеген дерегін анықтады. Қадағалаушы органның мәліметінше, невропатолог, кардиолог, хирург, психолог және басқа да бейінді мамандар қайтыс болған адамдарды "қабылдаған", ал акушер-гинеколог дәрігердің кеңесі ер адамдарға "көрсетілген". Шығынның жалпы сомасы 100 миллион теңгеден асты.
Еске сала кетейік, бұған дейін ӘМСҚ-ны тексеру жүйедегі жаппай былықты әшкерелеген болатын: Астанада бір дәрігер күніне 1 442 пациентті "қабылдаса", екіншісі бір айда 4 832 қабылдау өткізген. Құжаттарда қайтыс болған адамдарға көрсетілген медициналық қызметтер мен пациенттің жынысына сәйкес келмейтін жүздеген мың скрининг (ерлерге жасалған маммографияға дейін) тіркелген. Бұған қоса балаларға дәрі-дәрмекті жаппай қосып жазу және бір адамға бір тәулікте мыңдаған препаратты "есептен шығару" жағдайлары анықталды.
Мұндай талдаудан кейін премьер-министр Олжас Бектенов заңбұзушылық деректері бойынша материалдарды құқық қорғау органдарына беруді және ведомство барлық қаржы ағынын бақылап, жүйеде тәртіп орнатуы үшін ӘМСҚ-ны Қаржы министрлігінің қарамағына өткізуді тапсырды.
20 қаңтарда Президент Қасым-Жомарт Тоқаев премьер-министрдің Міндетті әлеуметтік медициналық сақтандыру қорын Қаржы министрлігінің қарамағына беру туралы шешімін қолдады.
Тоқаев қорда "көптеген заңбұзушылық пен теріс пайдалану", соның ішінде "мемлекет қаражатын аса ірі көлемде жымқыру мақсатындағы қосып жазу мен құжаттарды бұрмалаудың сұмдық деректері" анықталғанын мәлімдеді.
"Бүкіл ел сапалы экономикалық өсу мен инфрақұрылымдық жобаларды салуға, денсаулық сақтауды дамытуға күш-жігері мен қаражатын жұмылдырып жатқанда, әлеуметтік салаға бөлінген орасан зор қаржы талан-таражға түсіп жатыр", – деп атап өткен еді Президент.
2024-2025 жылдары денсаулық сақтауды дамытуға мемлекет тарапынан 7,8 триллион теңге бөлінгені атап өтілді.
Бізді Google-дың негізгі дереккөздер тізіміне қосыңыз
Қосу