Qazaq24.com, 7kun.KZ дереккөзінен алынған мәліметтерге сүйене отырып ақпарат бөліседі..
Алматыда қаланы көгалдандыру жүйесін дамыту мақсатында жеке тәлімбақ салу жоспарланып отыр.
Бұл мәселе қала әкімі Дархан Сатыбалдының төрағалығымен өткен арнайы кеңесте талқыланды.
Жиында айтылғандай, мегаполисте құрылыс пен абаттандыру жұмыстарының қарқынына байланысты жыл сайын көшетке сұраныс 1,4 миллионнан асады. Қазіргі таңда қалада өз тәлімбағы болмағандықтан, көшеттер сырттан жеткізіледі. Бұл олардың бағасына да, жерсіну сапасына да әсер етуде.
Әкімнің айтуынша, жеке тәлімбақ құру – көгалдандыру саласын тұрақтандыруға және қалалық ортаның сапасын арттыруға бағытталған маңызды қадам. Жоба аясында Алматының оңтүстік бөлігінде бірнеше учаскеде тәлімбақ орналастыру көзделіп отыр. Сонымен қатар, оның аумағын кеңейту мүмкіндігі де қарастырылуда.
Бастама қаланың климаттық ерекшеліктеріне бейімделген көшеттерді өсіруге және импортқа тәуелділікті азайтуға мүмкіндік береді. Сондай-ақ заманауи агротехнологияларды енгізу жоспарланған. Атап айтқанда, жылына 1 миллионға дейін көшет өсіретін микроклондық көбейту зертханасын құру көзделіп отыр.
Жобаға шетелдік инвесторлар да қызығушылық танытып отыр. Кеңес қорытындысы бойынша, қала басшысы жауапты органдарға жобаны кешенді түрде жүзеге асыруды, ғылыми базаны дамыту мен өндірістік қуатты кезең-кезеңімен іске қосуды тапсырды.