Qazaq24.com, Sputnik.KZ дереккөзінен алынған мәліметтерге сүйене отырып түсініктеме береді..
АСТАНА, 2 наурыз – Sputnik. "Туристік Қамқор" қорының төрағасы Инна Рей қақтығыс аймағында жүрген қазақстандық туристердің санын жариялады, деп хабарлайды Sputnik Қазақстан.
Бүгінде қазақстандықтар Біріккен Араб Әмірліктері мен Қатарға жиі барады.
"Мәселен, Біріккен Араб Әмірліктерінде 3 мыңнан астам, ал Қатарда 1 мыңнан астам адам бар. Олардың арасында балалар көп. Қазіргі кезде барлығы қонақ үйлерге орналастырылды", - деді Рей журналистерге берген сұхбатында.
Ал Мекке мен Мединада шамамен 200 қазақстандық турист қалды. Бүгінде қорға кіретін туристік компаниялар арқылы Таяу Шығысқа барған қазақстандықтардың барлығына көмек көрсетіліп жатыр.
"Қорда осы компаниялардың жиналған қаржысы бар. Олар соның есебінен туристерге баспана мен тамақтың ақысын төлеп жатыр. Сондықтан барлық міндет орындалады. Әзірше бізге зардап шеккендердің тарапынан арыз-шағым түскен жоқ", - деді Рей.
Осы орайда қор басшысы Таяу Шығысқа өздігімен барған туристердің бар екенін де еске салды. Олардың да саны аз емес. Ал эвакуациялауға арналған рейстер үшін аймақта әуе кеңістігі қауіпті болып тұр.