Egemen.KZ дереккөзінен алынған мәліметтерге сүйене отырып, Qazaq24.com түсініктеме жасады..
Амбулатория Мемлекет басшысының тапсырмасымен жүзеге асқан ұлттық жоба аясында салынған. Мұнда 1,5 мыңнан астам тұрғынға, оның ішінде 400-ден астам балаға медициналық қызмет көрсетіледі. Тұрғындар дәрігер қабылдауы, вакцинация, диагностика және телемедициналық кеңес алу сияқты қызметтерді ауылдан шықпай-ақ пайдалана алады.
Министрге облыстық онкологиялық орталық маманының қатысуымен телемедицина арқылы науқасқа қашықтан кеңес беру процесі көрсетілді. Бұл жүйе күрделі жағдайларда мамандардың қорытындысын жедел алуға және емдеу тактикасын уақытылы түзетуге мүмкіндік береді.
Қазір Қарағанды облысындағы 117 ауылдық медицина ұйымында телемедицинаны енгізу бойынша пилоттық жоба іске асырылуда. Оның аясында тұрғындар кардиолог, онколог, нейрохирург, травматолог және басқа да бейінді мамандардың қашықтан консультациясын ала алады.
Денсаулық сақтау министрлігінің мәліметінше, 2025 жылы елімізде 3,87 миллион телемедициналық қызмет көрсетілген, бұл өткен жылмен салыстырғанда 19%-ға көп. Қазіргі уақытта қашықтан көрсетілетін медициналық қызметтің 118 түрі қолжетімді.