Qazaq24.com, Aikyn.KZ дереккөзінен алынған мәліметтерге сүйене отырып ақпарат жариялайды..
Қарағанды қаласындағы «Алтын ғасыр» галереясында ерекше форматтағы көрме өтеді, – деп хабарлайды Aikyn.kz.
Көрменің креативті тұжырымдамасының авторы — қарағандылық суретші Дмитрий Кецман. Қараңғыда бейнені айқындауға мүмкіндік беретін көркемдік техниканы ол өзі әзірлеп, Phosphorescent shadow body деп атаған.
Суретші бұл әдістің қыр-сырын әдейі ашпайды. Оның айтуынша, белгісіздік көрермен қызығушылығын арттырып, көрменің ерекше атмосферасын қалыптастырады.
– Экспозицияға деген қызығушылықты сақтайтын құпия болуы керек деп ойлаймын. Залда мүлде қараңғылық орнамайды, тек қою жартылай қараңғылық болады. Сол себепті келушілерден қара немесе қою түсті киіммен келуді өтінеміз, бұл олардың көзге түспей, жалпы көркем кеңістіктің бір бөлшегіне айналуына мүмкіндік береді, – деді Дмитрий Кецман.
Экспозицияға қойылған туындыларды бір ғана фактор – орындалу техникасы біріктіреді. Ал тақырыптық мазмұны мен идеялық шешімі әртүрлі: әрбір картина өзіндік көңіл күй мен мағыналық жүктеме арқалайды.
Көрменің салтанатты ашылуы 14 ақпанда сағат 18:00-де өтеді. Кіру тегін. Көрме 19 ақпанға дейін көрерменге есігін айқара ашады.
Дмитрий Кецман – қарағандылық суретші, Ұлыбританиядағы Таланттардың жаһандық конфедерациясының алтын серіктесі, Мәскеудің Халықаралық суретшілер одағының мүшесі, сондай-ақ көптеген халықаралық фестивальдер мен байқаулардың лауреаты. Аталған экспозиция — суретшінің «Алтын ғасыр» галереясындағы үшінші жеке көрмесі.