Qazaq24.com, 7kun.KZ дереккөзінен алынған мәліметтерге сүйене отырып ақпарат жариялайды..
Қазақстан жасанды интеллект инфрақұрылымы мен мәліметтерді өңдеу орталықтарын дамытуға 10 млрд доллар инвестиция тартуды жоспарлап отыр.
Бұл туралы Премьер-министр Олжас Бектенов NVIDIA компаниясының вице-президенті Рев Лебаредян және америкалық Firebird компаниясының негізін қалаушылары Размик Овакимян мен Александр Есаян қатысқан кездесуде мәлімдеді.
Кездесу барысында ұлттық жасанды интеллект инфрақұрылымын дамыту, жоғары өнімді есептеу қуаттарын құру және халықаралық технологиялық серіктестерді тарту мәселелері талқыланды.
Үкіметтің мәліметінше, Екібастұз қаласында жүзеге асырылып жатқан «Мәліметтерді өңдеу орталықтары алқабы» жобасы Қазақстанның цифрлық трансформациясындағы негізгі бастамалардың бірі саналады. Жоба аясында қазіргі қолжетімді 300 мегаватт қуатты кезең-кезеңімен 1 гигаваттқа дейін жеткізу көзделген.
Премьер-министр Олжас Бектенов Мемлекет басшысының бастамасымен 2026 жылдың Цифрландыру және жасанды интеллект жылы болып жарияланғанын атап өтті.
«Қазіргі таңда негізгі цифрлық жобалардың бірі – Екібастұз қаласында “Деректерді өңдеу орталықтарының алқабы” жобасы жүзеге асырылып жатыр. Біздің мақсатымыз – жаһандық цифрлық инфрақұрылымды орналастыруға арналған алаң қалыптастыру», – деді Үкімет басшысы.
Премьер-министрдің орынбасары, жасанды интеллект және цифрлық даму министрі Жаслан Мәдиев жобаның аясында соңғы буындағы NVIDIA процессорлары негізінде 100 мың GPU-чиптен тұратын ауқымды есептеу кластері құрылатынын айтты.
Оның сөзінше, жоба толық іске қосылғаннан кейін Қазақстан экономикасына жыл сайын кемінде 3 млрд доллар экспорттық кіріс әкелуі мүмкін.
Кездесу қорытындысында Қазақстанның Жасанды интеллект және цифрлық даму министрлігі мен Firebird компаниясы арасында стратегиялық ынтымақтастық туралы келісімге, сондай-ақ «ДӨО алқабы» жобасын іске асыруға қатысты бірқатар құжаттарға қол қойылды.
Үкіметтің бағалауынша, бұл жобалар Қазақстанның Орталық Еуразиядағы ірі цифрлық хаб ретіндегі позициясын күшейтіп, халықаралық технологиялық компанияларды тартуға, жаңа жұмыс орындарын ашуға және жасанды интеллект экожүйесін дамытуға мүмкіндік береді.