Sputnik.KZ парақшасынан алынған деректерге сүйене отырып, Qazaq24.com мәлімдеме жасады..
АСТАНА, 28 мамыр – Sputnik. Астанада V Еуразиялық экономикалық форум басталды.
Энергетика министрі Ерлан Ақкенженов Форум аясында Қазақстан Ресеймен бірлесіп газ құбыры мәселесін талқылап жатқанын мәлімдеді. Министрдің айтуынша, Қазақстан аумағы арқылы өтетін транзит тиімді болады.
"Біз "Сібір күші - 2" деп аталатын жобаны талқылай бастадық, бірақ оның жұмыс атауы басқа. Бұл — Қазақстан аумағы арқылы Қытай Халық Республикасына жеткізілетін газ құбыры, ол жылына 35 миллиард текше метрге дейін газ жеткізеді. Қазақстан Республикасы ретінде біз транзиттің өз аумағымыз арқылы өткенін қалаймыз. Ол үшін біз барлық жағдай мен кепілдікті ұсынуға дайынбыз, сондай-ақ Қазақстан аумағында қосымша газ тұтыну да болады", — деді министр.
Сондай-ақ ол Қазақстан енді республиканың солтүстік және шығыс өңірлерін көгілдір отынмен қамтамасыз ете алатынын айтты.
Былтыр қыркүйекте Газпром Қытаймен "Сібір күші - 2" газ құбырын және Моңғолия арқылы өтетін әрі жылына 50 миллиард текше метр қуаттылығы бар "Одақ – Шығыс" транзиттік газ құбырын салу туралы меморандумға қол қойған болатын.
Биыл мамырда Ресей Федерациясы премьер-министрінің орынбасары Александр Новак Қытаймен "Сібір күші - 2" жобасы бойынша келісімдер аяқталуға жақын екенін, қазіргі таңда келісімшарттың техникалық пысықталуы жүріп жатқанын мәлімдеді.