Qazaq24.com, Sputnik.KZ дереккөзінен алынған мәліметтерге сүйене отырып түсініктеме береді..
АСТАНА, 16 шілде – Sputnik. Қазақстанда 2026 жылы жалпы құны 1,7 трлн теңге болатын 200 индустриялық жобаны жүзеге асыру жоспарланып отыр, деп хабарлады үкімет.
Жобаларды іске асыру нәтижесінде шамамен 18 мың тұрақты жұмыс орны ашылады. Қазіргі таңда жалпы құны 267 млрд теңге болатын 77 жоба іске қосылып, 4,5 мың адам жұмыспен қамтылған.
"Жобалар толық қуатына шыққаннан кейін бұл өндірістер жыл сайын шамамен 1,5 трлн теңгеге өнім шығарады. Оның ішінде 500 млрд теңгеге жуық өнім экспортқа бағытталады", – деп жазылған хабарламада.
Сондай-ақ биыл Қазақстанда бұрын өндірілмеген 15-тен астам жаңа тауар түрін шығару басталады. Олардың қатарында бірегей ірі габаритті машина жасау тораптары, арнайы техника, сутегі және күрделі минералды тұздар бар.
Өнеркәсіптік жобалардың қатарында 17 серпінді жобаға ерекше назар аударылып отыр. Бұл жобалар жоғары деңгейде өңделген өнім шығаруды дамытуға, отандық шикізатты тиімді пайдалануға және іргелес өндірістік кластерлерді қалыптастыруға бағытталған.
Осы бағдарлама аясында Қостанай облысында KIA Qazaqstan және Алматыда "Astana Motors Manufacturing Kazakhstan" зауыттары іске қосылды.
Сонымен қатар өңірлерде ірі өнеркәсіптік жобалар жүзеге асырылып жатыр. Павлодар облысында "Mineral Product International" компаниясының металлургиялық кластері құрылуда. Абай облысында Qarmet комбинатын жаңғырту және мыс балқыту зауытын салу жұмыстары жүргізіліп жатыр. Ал Атырау облысында "Силлено" және "Бутадиен" компанияларының ірі газ-химия кешендері салынып жатыр.
Айта кетері, 2025 жылы мұнай-газ химия саласындағы өндіріс көлемі екі есеге өсіп, 619 мың тоннаға жетті. Ал 2026 жылдың алғашқы бес айында бұл көрсеткіш 225,3 мың тоннаны құрады.