​Қазақстанда пара беруге уәде бергені үшін қылмыстық жауапкершілік енгізіліп жатыр

ЖИ көмегімен жасалған сурет

Қазақстанда пара беруге уәде бергені, ұсынғаны немесе пара талап еткені үшін қылмыстық жауапкершілік енгізілуде. Сенат депутаттары сыбайлас жемқорлыққа қарсы іс-қимыл мәселелері бойынша заңдар пакетін қабылдады.

Жаңа түзетулер сыбайлас жемқорлық тәуекелдерінің қатаң алдын алуға, мүдделер қақтығысын жоюға және мемлекеттік қызметте де, квазимемлекеттік секторда да жауапкершілікті күшейтуге бағытталған.

Негізгі өзгерістердің бірі — мүдделер қақтығысының алдын алудың толыққанды механизмін енгізу болды. Енді шенеуніктер мен оларға теңестірілген тұлғаларға өз өкілеттіктерін жеке мақсаттарына пайдалануға ресми түрде тыйым салынады. Сонымен қатар, олар өздерінің жеке мүдделерін декларациялауға міндеттеледі.

Туыстардың қайсысына бірге жұмыс істеуге тыйым салынады?

Заң туыстардың бірлесіп қызмет етуіне қойылатын шектеулерді елеулі түрде күшейтеді. Енді ережелер тек тікелей бағыныстылыққа ғана емес, сонымен бірге кез келген жанама әсерге, кадрлық сүйемелдеуге немесе ішкі бақылауға да қатысты болады.

Сонымен, бір ведомствода басшының қол астында немере-жиен, қайын жұрт өкілдері, балдыз, бажа, күйеу балаларға жұмыс істеуге тыйым салынады.

Сыбайлас жемқорлыққа қарсы шектеулер квазимемлекеттік сектор қызметкерлеріне және мемлекеттік бюджет пен Ұлттық қордан қаржыландырылатын жобалардың қатысушыларына да таралды. Бұл ретте мемлекеттік органдардағы барлық кадрлық процестер «Е-қызмет» жүйесі арқылы бірыңғай цифрлық форматқа көшіріледі.

Жаңа жазалар мен мерзімдер

Тек пара беруге уәде бергені немесе талап еткені үшін қолданылатын қылмыстық баптан бөлек, заңдар пакетінде келесі шаралар қарастырылған:

Мемлекеттік ұйымдар мен ұлттық компанияларда заңсыз сыйақы алғаны үшін жауапкершілік күшейтіледі.Сыбайлас жемқорлық құқық бұзушылықтары үшін заңды тұлғаларға салынатын айыппұл мөлшері өседі.Жеке тұлғалар үшін әкімшілік сыбайлас жемқорлық істері бойынша ескіру мерзімі 1 жылдан 3 жылға дейін ұзартылады.Сыбайлас жемқорлық үшін сотталғандарға жұмысқа орналасуға өмір бойы тыйым салу енді мемлекеттік функцияларды орындаумен байланысты барлық лауазымдарға нақты қатысты болады.

Заңдар Мемлекет басшысына қол қоюға жіберілді.

Бүгін, 15:06