Qazaq24.com, Tengrinews.KZ дереккөзінен алынған ақпаратқа сүйене отырып мәлімет бөліседі..
Қала көшелеріндегі жарыстар мен қатты шулайтын көліктерге камералар мен шу өлшегіштер арқылы да ден қою ұсынылды. Мұндай бастаманы Құрылтай мүшесі Кендебай Адамбек ішкі істер министріне жолдаған сауалында көтерді, - деп хабарлайды Tengri Auto.
Депутаттың айтуынша, Қазақстан қалаларының орталық көшесінде мотоциклдер мен тюнинг жасалған автокөліктердің жүргізушілері рұқсат етілмеген жарысты жиі ұйымдастырады. Олар жылдамдықты асырып, пиротехника қолданып, тұрғын үйлер орналасқан аумақта әдейі қатты шу шығарады.
Адамбек бұл мәселе тек жол қозғалысы ережелерін бұзумен шектелмейді деп есептейді. Оның пікірінше, бұл тұрғындардың тыныш демалуына кедергі келтіріп, қауіпсіздікке қатер төндіреді.
"Бұл мәселе жол қозғалысы ережесін бұзу шеңберінен шығып, қоғамдық қауіпсіздікке қатысты мәселеге айналды. Сонымен қатар азаматтардың тынығуына, түнгі тыныштығына теріс әсер келтіреді. Алайда құқық бұзушылар көп жағдайда жауапкершіліктен тыс қалып жатады. Оның бірнеше себебі бар", – деді депутат.
Кендебай Адамбектің сөзінше, қазір мұндай жағдайлар негізінен азаматтардың шағымынан кейін ғана тіркеледі.
"Шетелде мұндай тәсілдер қолданылады. Мысалы, АҚШ-та автоматты акустикалық камералар пайдаланылады. Кей жағдайда көлікті тәркілеу де қарастырылған. Германия мен Францияда түнгі рейдтер өткізіліп, арнайы жылжымалы зертханалар қолданылады", – деді ол.
Депутат түнгі уақытта тыныштықты бұзғаны үшін қолданыстағы айыппұл тым аз және ол құқық бұзушыларды тоқтатпайды деп санайды. Қазіргі уақытта жаза көлемі 5 АЕК немесе 21 625 теңге болады.
Осыған байланысты Кендебай Адамбек ІІМ-ге бес шараны қарастыруды ұсынды:
Камераларға қосуға болатын акустикалық кешендер мен шу өлшегіштерді орнату. Түнгі жарыстардың жолын тезірек кесу және пайдаланылған газдарды шығару жүйесі өзгертілген көліктерді тексеру үшін патрульдік және учаскелік полиция инспекторларының бірлескен экипаждарын құру. Заңсыз өзгерістер жойылғанға дейін құқық бұзушылардың көліктерін арнайы айып тұрақтарына жөнелту. Түнгі уақытта тыныштықты бұзғаны үшін айыппұл көлемін қайта қарап, жазаның мұндай құқық бұзушылықтардың салдарына сәйкестігін бағалау. Жолдағы құқық бұзушылықты қашан ұсақ бұзақылық деп санауға болатынын анықтау – мысалы, егер жүргізуші қоғамдық тәртіпті әдейі және демонстрациялық түрде бұзса.Бұған дейін Астанада екі жүргізуші қала көшелерінде жарыс ұйымдастырған болатын. Бейнетіркегіштен алынған жазба Threads желісінде жарияланды. Оған полиция қызметкерлері ден қойды.
Бізді Google-дың негізгі дереккөздер тізіміне қосыңыз
Қосу