Qazaq24.com, Sputnik.KZ дереккөзінен алынған мәліметтерге сүйене отырып ақпарат жариялайды..
АЛМАТЫ, 19 қаңтар – Sputnik. Қазақстанда ресми тіркелген жұмыссыздар саны ең төменгі деңгейге — 445,7 мың адамға дейін төмендеді, деп хабарлайды Ranking.kz.
Бұл – өткен жылдың төртінші тоқсанындағы Ұлттық статистика бюросының дерегі. Жұмыссыздық деңгейі 2024 жылдың соңғы тоқсанындағыдай 4,6% шамасында сақталды.
2025 жылдың қазан-желтоқсан айларының қорытындысы бойынша жұмыссыздық деңгейі ең жоғары өңір – Маңғыстау облысы (5%). Сондай-ақ Атырау және Павлодар облыстарында да жұмыссыздық жоғары – 4,9%. Ал Жамбыл облысы, Ақтөбе облысы, Абай облысы және Жетісу облысында көрсеткіш орташа деңгейден жоғары (4,7-4,8%).
Өткен жылдың соңында жұмыссыздықтың ең төмен деңгейі Қарағанды (4%), Ұлытау (4,1%) және Солтүстік Қазақстан (4,4%) облыстарында, сондай-ақ Астанада (4,3%) тіркелді.
Қазақстандағы жұмыссыздардың жартысынан көбі – орта жастағы 35-тен 44 жасқа дейінгі адамдар. 2025 жылдың қазан-желтоқсан айларында жұмыссыздар арасында зейнеткерлік жасқа дейінгі қазақстандықтардың үлесі де айтарлықтай жоғары болды: 19,7%.
Былтыр қазан-желтоқсан айларында жұмыссыздардың 14,4%-і отбасылық жағдайға байланысты, 4,5%-і денсаулығына байланысты жұмыс істемесе, 9,1%-і үй шаруашылығымен айналысуды жөн көрген.