Qazaq24.com, 7kun.KZ дереккөзінен алынған мәліметтерге сүйене отырып мәлімдеме жасады..
Қазақстанда салынатын алғашқы атом электр станциясының жалпы құны шамамен 16,4 млрд доллар болады.
Бұл туралы Атом энергиясы жөніндегі агенттіктің баспасөз қызметі мәлімдеді.
Агенттік мәліметінше, қаржының негізгі бөлігі – 14,4 млрд доллар екі энергоблоктың құрылысына бағытталады. Тағы шамамен 2 млрд доллар инфрақұрылымды дамытуға, қауіпсіздік жүйелеріне және отынмен қамтамасыз етуге жұмсалмақ.
«Жобаның барлық құны шамамен 16,4 млрд доллар болады», – делінген агенттік таратқан хабарламада.
Әзірге аталған соманың нақты қандай бөлігі Ресейдің кредиті есебінен қаржыландырылатыны жарияланған жоқ. Дегенмен бұған дейін ресейлік экспорттық кредит жобаның негізгі бөлігін қамтуы мүмкін екені айтылған.
Айта кетейік, бұған дейін Атом энергиясы жөніндегі агенттік төрағасы Алмасадам Сәтқалиев алғашқы АЭС құрылысының алдын ала құны шамамен 15 млрд доллар болуы мүмкін екенін мәлімдеген еді.
«Росатом» басшысы Алексей Лихачевтің айтуынша, Қазақстандағы АЭС құрылысының белсенді кезеңін 2027 жылы бастау жоспарланып отыр.
Бүгін Астанада өткен келіссөздер аясында Қазақстан мен Ресей алғашқы атом электр станциясын салуға қатысты ынтымақтастық және мемлекеттік экспорттық кредит беру жөніндегі келісімдерге қол қойды.