Qazaq24.com, 7kun.KZ дереккөзінен алынған ақпаратқа сүйене отырып жаңалық таратты..
Қазақстандық авиакомпаниялардың паркі тағы 6 ұшақпен толығады. Бұл туралы Үкімет отырысында Көлік министрі Нұрлан Сауранбаев мәлімдеді.
Министрдің айтуынша, әлемдік авиация саласында ұшақ тапшылығы байқалып отыр. Қазір жаңа әуе кемесіне тапсырыс берген компаниялар оны тек 8-10 жылдан кейін ғана ала алады.
Осыған қарамастан, Қазақстан авиациялық флотты кезең-кезеңімен жаңартып жатыр. Былтыр отандық компаниялар америкалық Boeing өндірушісімен 15 млрд долларлық келісім жасаған. Ал 2026 жылы үш ұшақ сатып алынған. Оның ішінде жақында ғана SCAT әуе компаниясының паркіне екі жаңа Boeing ұшағы қосылды.
– Осы жылдың соңына дейін қазақстандық авиакомпаниялардың паркіне тағы 6 ұшақ келеді, – деді Нұрлан Сауранбаев.
Министр азаматтық авиация саласында қажетті институционалдық база толық қалыптасқанын атап өтті. Оның сөзінше, Қазақстан Халықаралық азаматтық авиация ұйымының (ИКАО) талаптарына жоғары деңгейде сәйкес келеді.
Қазіргі таңда еліміздегі әуежайлардың қауіпсіздік деңгейі 95,7 пайызды, ал авиакомпаниялардың қауіпсіздік көрсеткіші 82 пайызды құрайды. Осы нәтижелердің арқасында Қазақстан авиациялық қауіпсіздік бойынша әлемдегі үздік 20 елдің қатарына енген.
Сонымен қатар қауіпсіздікті күшейту мақсатында Әуе апаттарын тергеу орталығы құрылған. Авиациялық әкімшілікке халықаралық сарапшылар тартылып, ИКАО-мен бірлесіп 2050 жылға дейінгі авиацияны дамытуға арналған мастер-жоспар әзірленіп жатыр.