Qazaq24.com, Sputnik.KZ дереккөзінен алынған мәліметтерге сүйене отырып ақпарат бөліседі..
АСТАНА, 23 тамыз – Sputnik. Қазақстандық ғалымдар құрғақшылық пен топырақтың тұздануына төзімді арпаның жаңа сортын шығарды, деп хабарлайды ауыл шаруашылығы министрлігі.
Жаздық дәнді арпаның жаңа сорты "Батырхан" деп аталады.
"Жаңа сорт Қазақстанның ауыл шаруашылығы өндірісіне тән агроклиматтық және топырақ жағдайларын ескере отырып әзірленген. "Батырхан" жоғары әрі тұрақты өнімділігі мол, дәні ірі, жатып қалуға және бірқатар ауруларға төзімді. Сондай-ақ құрғақшылық пен топырақтың тұздануына өте төзімді", - дейді министрлікте.
"Батырхан" жаздық даму типіне жатады. Оның вегетациялық кезеңі 75–85 күн.
Ауруларға төзімділігі бойынша "Батырхан" тозаңды және қатты қаракүйеге төзімді, ал фузариозды тамыр шірігіне оңайлықпен шалдықпайды.
"Сорттың маңызды биологиялық ерекшеліктерінің бірі — "түптену–түтікке шығу" кезеңінің кемінде 20 күнге созылуы. Бұл кезеңнің салыстырмалы түрде ұзақ болуы өсімдіктің жеткілікті вегетативтік массаны қалыптастыруына және дәнмен жақсы толысқан өнімді масақтардың түзілуіне қолайлы жағдай жасайды", - дейді ауыл шаруашылығы министрлігінде.