Sputnik.KZ парақшасындағы ақпаратқа сәйкес, Qazaq24.com хабар таратты..
АСТАНА, 25 қазан – Sputnik. Қазақстан тарихында тұңғыш рет Ішкі істер министрлігі академиясының курсанты Әли Бауыржан BoxRec рейтингінің үздік ондығына енді, деп хабарлайды Қазақстан кәсіби бокс федерациясы.
Бокстан Қазақстанның спорт шебері, елдің екі дүркін чемпионы және Азия біріншілігінің жүлдегері Әли Бауыржан отандық спорт тарихында жаңа белесті бағындырды.
"Ол ТМД бойынша кәсіпқой бокс тарихына еніп, әлемге әйгілі BoxRec порталының топ-10 рейтингіне кірген алғашқы әрі жалғыз әскери курсант атанды", - деп жазылған хабарламада.
BoxRec – бұл президент, министрлік немесе жекелеген спортшылардың ықпалы жүрмейтін, толықтай тәуелсіз компьютерлік алгоритмге негізделген халықаралық статистикалық база. Бұл жүйенің шынайылығы мен әділдігін әлемдік WBA, WBC, IBF, WBO сияқты беделді бокс ұйымдары мен IBA халықаралық қауымдастығы толықтай мойындайды.
Дәл осындай қатал әрі бейтарап цифрлық сұрыптаудан өтіп, әлемнің ең үздік он боксшысының қатарынан көріну – Әли Бауыржанның және бүкіл отандық спорт пен әскери саланың теңдессіз жетістігі, дейді федерацияда.