Қазақстандықтар бензин сапасына шағымдануда Сауда министрлігі тексеруді бастады

Қазақстандықтар бензин сапасына әлі де шағымданып жатыр. Қазіргі уақытта Сауда және интеграция министрлігінің қарауында автокөлік иелерінен түскен 12 өтініш бар. Шағымдар аясында ведомство мұнай өңдеу зауытынан бастап жанармай құю бекеттеріне (ЖҚС) дейінгі бүкіл тізбек бойынша отын сапасын тексере бастады, деп хабарлайды Tengrinews.kz ведомствоның баспасөз қызметіне сілтеме жасап.

Сауда және интеграция министрлігінің мәліметінше, тоғыз өтініш Астана тұрғындарынан, біреуі Павлодардан және тағы екеуі Солтүстік Қазақстан облысынан түскен.

Бензин зауытта және ЖҚС-да тексеріледі

Тәуелсіз зертханаға тікелей Павлодар мұнай-химия зауытында іріктелген бензиннің арбитраж сынамалары тапсырылды.

Мамандар Sinoil, QazaqOil және Helios қоспалары бар отын үлгілерін бөлек зерттеп жатыр. Бұл зерттеулердің нәтижесі бір апта ішінде белгілі болмақ.

Сонымен қатар мамандар 17 ЖҚС-да бензинді бақылау мақсатында сатып алуды жүзеге асырды:

бесеуі - Алматыда; бесеуі - Алматы облысында; алтауы - Абай облысында; біреуі - Жамбыл облысында.

Қазір іріктелген үлгілер зертханалық сынақтан өтіп жатыр.

Сауда министрлігі тексеріс зауыт және жанармай бекеттерімен шектелмейтінін түсіндірді. Сынамаларды отын қозғалысының бүкіл тізбегі бойынша, соның ішінде мұнай базаларында да алу жоспарланған. Осылайша, мамандар бензин сапасына қатысты мәселелердің қай кезеңде туындауы мүмкін екенін анықтамақ.

Егер отынның техникалық регламент талаптарына сәйкес келмейтіні анықталса, оны сатуға тыйым салынып, сапасыз жанар-жағармай материалдары тәркіленеді.

Энергетика министрлігі не деді?

Бұған дейін қазақстандық автокөлік иелері әлеуметтік желілерде АИ-95 және АИ-98 бензинінің сапасына жаппай шағымдана бастаған болатын. Кейбір жүргізушілер жанармай құйғаннан кейін қозғалтқышта ақаулар пайда болғанын айтты.

25 тамызда Энергетика министрі Ерлан Ақкенженов мамандар жанармай сапасын тексеру үшін Павлодар мұнай-химия зауытына аттанғанын хабарлады. Ол кезде ықтимал мәселе себебі әлі анықталмаған еді.

Министрдің айтуынша, ЖҚС желілері мұнай өңдеу зауытын кінәласа, зауыт өкілдері мәселе жанармай бекеттерінің өздерінде туындауы мүмкін екенін айтқан. Ақкенженов жағдайды жақын арада анықтауға уәде берді.

Кейін Павлодар мұнай-химия зауыты арбитраж сынамалардың жеке сынақ нәтижесін жариялады. Кәсіпорын мәліметінше, тексерілген бензин партиялары мемлекеттік стандарт пен техникалық регламент талаптарына сәйкес келген.

Қазір Сауда министрлігі тексерісті жалғастырып жатыр, отын зауытта ғана емес, одан кейінгі кезеңдерде - автокөлік жүргізушілеріне сатылғанға дейінгі аралықта зерттеледі.

Google News арқылы жаңалықтарымызды қадағалаңыз

Жазылу