Қазақстандықтар кене шаққаннан кейін энцефалитті қаншалықты жиі жұқтырады статистика

Tengrinews.KZ парақшасынан алынған деректерге сүйене отырып, Qazaq24.com мәлімдеме жасады..

13 мыңнан аса қазақстандық кене шағып, дәрігер көмегіне жүгінген, олардың жартысына жуығы - балалар. Сарапшы кенелер қай жерде жиі кездесетінін және олардың шағуы қаншалықты жиі энцефалитті жұқтыруға әкелетінін айтып берді, - деп хабарлайды TengriHealth.

Қазақстандықтар кене энцефалитін қаншалықты жиі жұқтырады?

Санитариялық-эпидемиологиялық бақылау комитеті төрағасы Сархат Бейсенованың мәліметінше, маусым басталғалы бері кене шаққаннан кейін 13 мыңнан аса адам медициналық көмекке жүгінген, олардың 45 пайызға жуығы - 14 жасқа дейінгі балалар. Сарапшының айтуынша, кене шағу жағдайлары көбіне Алматы және Шығыс Қазақстан облыстарында, сондай-ақ Алматы қаласында тіркелген.

Кене энцефалитіне күдікпен 454 адамға медициналық тексеру жүргізілді.

Ақмола, Шығыс Қазақстан, Солтүстік Қазақстан облыстары, сондай-ақ Астана мен Алматыда 24 науқастың диагнозы расталды.

Сархат Бейсенованың айтуынша, Қазақстанда жыл сайын кене энцефалитінің 24-тен 48-ге дейін жағдайы тіркеледі.

Анықтама: Жыл сайын кене шаққаннан кейін 10-нан 16 мыңға дейін адам дәрігерге жүгінеді.

"Көктемнің ерте келуі мен қолайлы ауа райы кенелердің белсенділігін арттырды. Соның салдарынан кене шаққаннан кейін медициналық көмекке жүгінгендердің саны да көбейді", – деді маман Өңірлік коммуникациялар қызметінде өткен брифингте.

Мамандар адамдардан алынған 1 200-ден аса кенеге зерттеу жүргізді. Олардың 20-сынан (1,7 пайызы) кене энцефалиті вирусы анықталды.

Шұғыл профилактика

Санэпидбақылау комитетінің төрағасы кенеге қарсы иммуноглобулинмен шұғыл профилактиканы 12 мыңға жуық адам немесе барлық зардап шеккен адамның 90 пайыздан астамы алғанын атап өтті.

Профилактика жүргізілмеуінің негізгі себептері:

кене энцефалиті бойынша эндемиялық болып саналмайтын аумақтарда кене шағуы; медициналық көмекке кеш жүгіну; бұған дейін вакцинациядан өтуі; медициналық қарсы көрсетілімдер немесе пациенттің өз бетінше бас тартуы.

Спикердің сөзінше, қазіргі уақытта эндемиялық аймақтарда 16 литрге жуық кенеге қарсы иммуноглобулин қоры бар.

Сондай-ақ ол маусымның аяғына дейін иммуноглобулиннің қажетті қорын сақтау үшін эндемиялық өңірлердің денсаулық сақтау басқармалары препараттың қосымша 39 литрін сатып алуға өтінім беріп қойғанын хабарлады.

Кімдерге вакцинация жасау ұсынылады?

Сархат Бейсенова кене энцефалитіне қарсы жоспарлы вакцинациядан жұмысы табиғи инфекция ошақтарында болумен байланысты адамдар өтетінін еске салды. Бұл ең алдымен орманшылар, қорықшылар, геологиялық барлау партияларының қызметкерлері, аңшылар және басқа да мамандар.

Жыл басынан бері 9 мыңнан аса адам екпе алған. Сондай-ақ ведомство кене белсенділігі маусымы жалғасып жатқандықтан, ормандарға, саябақтарға және басқа да табиғи аумақтарға барғанда сақтық шараларын сақтауға шақырды.