Tengrinews.KZ парақшасындағы ақпаратқа сәйкес, Qazaq24.com хабар таратты..
Қазақстандықтар онлайн-платформалардан сатып алған сапалы әрі ақауы жоқ тауарларды екі апта ішінде қайтара алады. Мұндай мүмкіндік ЕАЭО елдері қол қойған Еуразиялық экономикалық одақтағы тауарлармен жасалатын электрондық сауда туралы келісімде қарастырылған, деп хабарлайды Tengrinews.kz тілшісі.
Қандай тауарларды 14 күн ішінде қайтаруға болады?
Келісім тармақтарының бірінде сатып алушы тауарды алғанға дейін немесе алғаннан кейін 14 күнтізбелік күн ішінде тиісті сападағы тауардан бас тартуға құқылы екені айтылған.
Басқаша айтқанда, сатып алынған затта ешқандай мін болмаса да, мәселен, ол ұнамай қалса немесе сатып алушы райынан қайтса, оны қайтаруға болады. Мұндай жағдайда ақау іздеудің немесе бас тарту себебін түсіндірудің қажеті жоқ.
Дегенмен, құжат әлі күшіне енген жоқ. Сауда және интеграция министрлігінің Tengrinews.kz-ке хабарлағаны бойынша, 2026 жылғы 7 тамызда ЕАЭО елдері тауарлармен жасалатын электрондық сауда туралы келісімге қол қойды, ол одақ елдерінде онлайн-сатып алуларға ортақ ережелерді белгілеуі тиіс.
Анықтама: Ол үшін ЕАЭО-тағы барлық мемлекет ішкі мемлекеттік рәсімдерді аяқтап, депозитарийге тиісті хабарлама жіберуі қажет. Соңғы хабарлама алынғаннан кейін келісім 180 күннен соң күшіне енеді.
Министрлік Қазақстанда қажетті рәсім әлі аяқталмағанын нақтылады.
"Осыған байланысты, келісім ережелері Қазақстанның қолданыстағы заңнамасын алмастырмайды және құжат күшіне енгенге дейін қазақстандық сатушылар мен электрондық сауда алаңдарына жаңа міндетті талаптар туындатпайды", – делінген министрліктің жауабында.
Айта кетейік, келісім ЕАЭО-дағы барлық елде: Қазақстан, Ресей, Беларусь, Армения және Қырғызстанда қолданылады.
Құжатта ЕАЭО елдері интернет арқылы тауар сатып алу кезінде тұтынушылардың құқықтарын кәдімгі саудадағыдан кем түспейтіндей деңгейде қорғауы тиіс екені айтылған. Бұл ретте қорғау сатып алушы орналасқан елдің заңнамасына сәйкес келуі керек.
"Тұтынушы тиісті сападағы тауардан бас тартқан жағдайда, электрондық сауданың кәсіби қатысушысы оған шарт бойынша төлеген ақшасын қайтарады", – делінген келісімде.
Электрондық сауда алаңының операторы сатып алушылар мен сатушыларға дауды сотқа жүгінбей-ақ шешуге көмектесуі тиіс.
Сондай-ақ сатушы сатып алушыларға қандай төлем тәсілдері қолжетімді екенін өзі анықтайды, оның ішінде тауарды ЕАЭО елдерінің ұлттық төлем жүйелері арқылы төлеуге бола ма, жоқ па екенін шешеді. Бұл ретте ол сатып алушы орналасқан елдің заңнамасын сақтауға міндетті.
Тауарларды қайтарудың нақты шарттары мен ақшаны қайтару мерзімі Еуразиялық экономикалық комиссияның жеке актілерімен белгіленеді.
Келісім күшіне енгеннен кейін ЕАЭО-ның басқа елдеріндегі сатушылардан тауар сатып алатын қазақстандықтардың құқықтары Қазақстан заңнамасы бойынша қорғалады. Бұл ретте министрлік Қазақстанда онлайн-сатып алу кезіндегі сатып алушылардың құқықтары заңмен қорғалғанын нақтылады.
Бүгінде Қазақстанда тауарды қайтарудың қандай ережелері қолданылады?Тауарларды қайтаруға келетін болсақ, "Тұтынушылардың құқықтарын қорғау туралы" заңның 14-бабына сәйкес, азық-түлікке жатпайтын тауарды алғаннан кейін сатып алушы, мысалы, оның өлшемі, түсі немесе үлгісі сәйкес келмесе, 14 күн ішінде ауыстыруға құқылы
"Осылайша, келісімде қарастырылған тұтынушының тиісті сападағы тауарды алғанға дейін одан бас тарту немесе оны алған күннен бастап 14 күнтізбелік күн ішінде қайтару құқығы тауарларды қайтарудың жаңа тәртібі емес", – деп толықтырды Сауда министрлігі.
Бұған дейін Қазақстанда тауарлар мен қызметтер сататын шетелдік маркетплейстер мен басқа да шетелдік интернет-компанияларға салықтық бақылауды кеңейту ұсынылып жатқаны туралы жазған едік. Банктер мен төлем ұйымдары салық қызметіне деректерді, соның ішінде Қазақстанда тіркелмеген компаниялар туралы мәліметтерді беруге міндеттелуі мүмкін. Толығырақ мына сілтеме арқылы оқыңыз.
Бізді Google-дың негізгі дереккөздер тізіміне қосыңыз
Қосу