Qazaq24.com, Sputnik.KZ дереккөзінен алынған мәліметтерге сүйене отырып түсініктеме береді..
АСТАНА, 2 қараша – Sputnik. Испаниядан Алматы қаласына Қазақстан Қарулы күштерінің Әуе қорғанысы күштеріне екінші ауыр әскери-көлік Airbus A400M Atlas ұшағы жеткізілді, деп хабарлады Қорғаныс министрлігі.
A400M ұшақтары қорғаныс міндеттерін орындаумен қатар, төтенше жағдайлардың салдарын жою, халықты эвакуациялау және гуманитарлық көмек жеткізу мақсатында да пайдаланылуы мүмкін.
"Сондай-ақ жаңа ұшақтар қазақстандық әскери қызметшілерді халықаралық бітімгерлік миссияларға жеткізуге мүмкіндік береді. Осылайша, Қазақстан бітімгерлік контингентін басқа елдердің көмегінсіз тасымалдау мүмкіндігіне ие болады", - деп жазылған хабарламада.
Жаңа ұшақтарды басқару және оларға техникалық қызмет көрсету үшін қазақстандық мамандар арнайы дайындықтан өтті. Экипаждар мен инженерлік-техникалық қызметкерлер Испанияның Севилья қаласындағы Airbus оқу орталығында теориялық және практикалық курстардан өтті.
Airbus A400M – ауыр әскери техниканы алыс қашықтыққа тасымалдауға арналған ұшақ. Оның басты ерекшелігі – қысқа әрі арнайы жабын төселмеген ұшу-қону жолақтарына қона алады.
Қазіргі уақытта мұндай ұшақтар Қазақстан, Түркия, Германия, Малайзия, Индонезия, Франция, Ұлыбритания, Испания, Бельгия және Люксембургтің қарулы күштерінде қолданылады.