Қазақстаннан Токиоға тікелей рейс: билет бағасы мен ұшу уақыты

Air Astana Алматы мен Токио арасында тікелей рейстерді іске қосады. Бұл туралы әуекомпанияның баспасөз қызметі мәлім етті, - деп хабарлайды Tengri Travel.

Алғашқы рейс Алматыдан 2026 жылғы 30 қарашада, ал Токиодан кері қайтатын алғашқы рейс 2026 жылғы 1 желтоқсанға жоспарланған.

Компания мәліметінше, жаңа әуе қатынасы Airbus A321LR ұшақтарымен жүзеге асырылады.

Рейстер Токионың Нарита халықаралық әуежайына аптасына екі рет бизнес және эконом-класс салондарымен жабдықталған ұшақтармен орындалады.
Рейстер кестесі (жергілікті уақыт бойынша, үкімет мақұлдаған жағдайда):

KC171 Алматы–Токио рейсі дүйсенбі және бейсенбі күндері Алматыдан сағат 21:55-те ұшып, келесі күні сағат 09:25-те Токиоға қонады. KC172 Токио–Алматы рейсі сейсенбі және жұма күндері Токиодан сағат 10:55-те ұшып, Алматыға сағат 16:20-да жетеді.

Ұшу ұзақтығы Алматыдан Токиоға дейін 7 сағат 30 минутты, ал кері бағытта 9 сағат 25 минут болады.

Air Astana мен Japan Airlines арасындағы қолданыстағы серіктестік аясында Токио (Нарита) мен Алматы арасындағы рейстер код-шеринг режимінде орындалады.

Эконом-кластағы екі жаққа арналған билеттің минималды құны (барлық алымды қосқанда) 350 552 теңгеден, бизнес-класта – 1 398 918 теңгеден басталады.

Жапония азаматтары Қазақстанға 30 күнге дейін визасыз келе алады. Қазақстан азаматтарына Жапонияға бару үшін виза қажет.

Қазақстаннан Токиоға қатынайтын рейс

Жапония қазақстандықтар үшін ең көп күтілген бағыттардың бірі болып қала берді. Бұған дейін Азаматтық авиация комитеті Жапония астанасы Токиомен тікелей әуе қатынасын ашу мәселесі пысықталып жатқанын хабарлаған болатын.

"Қазіргі уақытта биыл Токиомен тікелей әуе қатынасын орнату бойынша жоспарлы жұмыстар жүргізіліп жатыр", - деп мәлімдеді ведомство өкілдері.

Айта кетейік, бұл бағыт бірнеше жылдан бері талқыланып келеді, ал мерзімі бірнеше рет өзгерді. Сәуірде Көлік министрлігі бұл іркілісті Boeing Dreamliner ұшақтарының жеткізілуімен түсіндірген болатын. Мамырда көлік министрі Нұрлан Сауранбаев рейстің 2026 жылдың төртінші тоқсанында іске қосылуы мүмкін екенін айтты.

Мамырда премьер-министр Олжас Бектенов Токио мен Нью-Йоркке рейстердің ашылатыны туралы уәде беріліп келе жатқанына біраз болғанын еске салды.

"Құр сөз болып қалмасын тағы да", – деп қадап айтқан ол, жұмысты нақты нәтижеге дейін жеткізуді тапсырды.

Бізді Google-дың негізгі дереккөздер тізіміне қосыңыз

Қосу