Sputnik.KZ парақшасынан алынған деректерге сүйене отырып, Qazaq24.com хабарлама жасады..
АСТАНА, 26 мамыр – Sputnik. Eуразия даму банкі ЕАЭО елдері экономикалары бойынша апта сайынғы макроэкономикалық шолуды жариялады.
"Қазақстанда негізгі капиталға салынған инвестициялар көлемі артқан. 2026 жылдың қаңтар-сәуір айларында бұл көрсеткіш 4,9 трлн теңгені ($10,4 млрд) құрап, 2025 жылдың осы кезеңімен салыстырғанда 6,7%-ға өсті", - дейді сарапшылар.
Ал тау-кен өндіру өнеркәсібіне салынған инвестиция 9,5%-ға төмендеген.
Ресейде инфляция баяулауын жалғастырды: сәуір айында баға өсімі наурыздағы 5,9%-дан 5,6%-ға дейін төмендеді. Бұған азық-түлік инфляциясының баяулауы әсер еткен – ол бір ай бұрынғы 6%-дан 4%-ға дейін азайды.
Бұл көбіне маусымдық көкөністер мен жемістер бағасының 6,6%-ға төмендеуімен байланысты. Базалық инфляция 5% деңгейінде сақталды. Сонымен қатар рубльдің нығаюы да әсер етіп отыр.
Қырғызстанда ЖІӨ өсімі жеделдеп, қаңтар-сәуір айларында 12,4%-ға жетті. Бірінші тоқсан қорытындысында бұл көрсеткіш 10,1% болған. Негізгі өсімді құрылыс саласы қамтамасыз етті (+3,75 пайыздық тармақ).
"Бұған қоса, бірнеше шағын су электр станцияларының іске қосылуы да оң әсер етті. Өнеркәсіпте негізгі металдар өндірісі 11,6%-ға артқан. Қызмет көрсету саласы 7,3%-ға өсті.2026 жылдың қорытындысы бойынша ЖІӨ 10%-дан асады деп болжап отырмыз", - деп хабарлады ЕАДБ.
Арменияның да ЖІӨ көлемі артқан. 2026 жылдың бірінші тоқсанының қорытындысы бойынша өсім 4%-ды құрады.
Өсімге тау-кен өндіру өнеркәсібі, жылжымайтын мүлік операциялары, құрылыс және ІТ секторы негізгі үлес қосты. Бұл салалардағы өсім тиісінше 35,5%, 7,6%, 20,6% және 7,6% болды.
Беларусь экономикасы қайтадан өсім көрсете бастады. Қаңтар-сәуір айларында ЖІӨ өткен жылмен салыстырғанда 0,2%-ға өсті. Ал қаңтар-наурыз аралығында 0,4%-ға төмендеу байқалған еді.
Бөлшек сауда айналымы 6,2%-ға өсті. Инвестициялық ахуал да біртіндеп жақсарып келеді. Құрылыс жұмыстары көлемінің төмендеуі қаңтар-сәуірде 2,8%-ға дейін баяуласа, қаңтар-наурызда бұл көрсеткіш 4,2% болған.
Негізгі капиталға салынған инвестиция 0,6%-ға қысқарды. Өнеркәсіп саласы тежеуші фактор болып отыр – өндіріс көлемі 2,5%-ға азайды. Тұтынушылық белсенділіктің артуы, инвестициялардың қалпына келуі және құрылыс саласындағы оң динамика 2026 жылдың екінші тоқсанында ЖІӨ өсімін жеделдетуге мүмкіндік береді.