Qazaq24.com, Aikyn.KZ дереккөзінен алынған мәліметтерге сүйене отырып ақпарат бөліседі..
Мониторинг жұмыстарына партияның өңірлік филиалы жанындағы кеңес мүшелері, «AMANAT» партиясының ШҚО филиалы жанындағы Әйелдер қанатының өкілдері, партия белсенділері мен мәслихат депутаттары қатысты.
«Жанұя» орталығының негізгі міндеті – өмірлік қиын жағдайға тап болған азаматтар мен отбасыларға кешенді қолдау көрсету. Мұнда психологтер, заңгерлер, әлеуметтік қызметкерлер мен жұмыспен қамту мамандары бірлесіп, қиын жағдайдан шығу жолдарын ұсынады.
Орталыққа түсетін ақпарат түрлі мемлекеттік мекемелерден жолданады: білім беру ұйымдары, денсаулық сақтау саласы, полиция, пробация қызметі, жұмыспен қамту бөлімдері және ауылдық округ әкімдіктері. Сонымен қатар азаматтардың тікелей өтініштері, ҮЕҰ-дан келетін хабарламалар және мобильді топтардан түсетін сигналдар да қаралады.
Барлық мәліметтер FSM Social ақпараттық жүйесінде тіркеліп, әр отбасы бойынша дербес карта әзірленеді. Бұл көрсетілетін көмекті дұрыс жоспарлап, отбасының нақты қажеттіліктерін анықтауға мүмкіндік береді.
«Бүгінгі таңда мемлекет пен қоғам үшін басты міндеттердің бірі – қиын жағдайға тап болған отбасыларды қолдау. «Жанұя» орталығының жұмысы осы бағытта өте маңызды. Біз әр отбасының тағдырына бейжай қарамауымыз керек. Партияның басты мақсаты – осындай орталықтардың жұмысын күшейту, азаматтарға қолжетімді және сапалы көмек көрсетуге жағдай жасау. Мониторинг барысында көтерілген мәселелер мен ұсыныстар міндетті түрде бақылауға алынып, шешімін табады», – деді облыстық мәслихат депутаты Сания Аубакирова.
Партиялық мониторинг нәтижелері бойынша орталық жұмысының тиімділігін арттыруға бағытталған ұсыныстар әзірленіп, тиісті мемлекеттік органдарға жолданатын болады.
«AMANAT» партиясы отбасы институтын қолдауды, әлеуметтік осал санаттағы азаматтарға көрсетілетін көмектің сапасын арттыруды әрі қарай да басты назарда ұстайды.
Елнар ЕЛТАЙ