Qazaq24.com, Tengrinews.KZ дереккөзінен алынған ақпаратқа сүйене отырып жаңалық таратады..
Қазақстанның Қорғаныс министрлігі ҰҚШҰ-ның алдағы оқу-жаттығуларына байланысты ресми мәлімдеме таратты. Оның аясында ел аумағында әскери техника мен жеке құрамның қозғалысы жоспарланған, - деп хабарлайды Tengrinews.kz.
Қазақстан арқылы әскери техника өтеді
21 қыркүйек пен 5 қазан аралығында Қазақстан аумағы арқылы теміржол көлігімен әскери техника мен жеке құрамның қозғалысы жоспарланып отыр. Әскери қызметшілер мен техника Ресейдің Челябинск облысындағы Мисящ станциясына дейін және кері бағытта қатынайды.
Бұл қозғалыс 24 қыркүйек пен 3 қазан аралығында Ресейде өтетін ҰҚШҰ-ның "Өзара іс-қимыл – 2026", "Іздеу – 2026" және "Эшелон – 2026" оқу-жаттығуларын өткізумен байланысты.
Оқу-жаттығулар барысында далалық сабақтар өткізіліп, оның аясында шеру дайындығы, бөлімшелерді басқару және қойылған міндеттерді орындау пысықталады.
Қорғаныс министрлігі қауесет таратпауға шақырды"Азаматтардан, бұқаралық ақпарат құралдарының өкілдерінен және әлеуметтік желі пайдаланушыларынан тексерілмеген ақпаратты таратпауды және ресми дереккөздерде жарияланған мәліметтерді ғана назарға алуды сұраймыз", - делінген хабарламада.
Ведомство көрінеу жалған ақпарат тарату және шындыққа жанаспайтын мәліметтерді жариялау Қазақстан заңнамасына сәйкес жауапкершілікке әкеп соқтыруы мүмкін екенін ескертті.
Еске салайық, Қорғаныс министрлігі бұған дейін де қазақстандықтарға әскери техниканың қозғалысы туралы "Батыл тойтарыс – 2026" стратегиялық командалық-штабтық оқу-жаттығуы аясында ескерткен болатын. Ол кезде қару-жарақ, әскери техника мен жеке құрам жауынгерлік дайындық аудандарына теміржол эшелондары, автокөлік колонналары және авиация көмегімен жеткізілген еді.
Бізді Google-дың негізгі дереккөздер тізіміне қосыңыз
Қосу