Qazaq24.com, Egemen.KZ дереккөзінен алынған мәліметтерге сүйене отырып ақпарат жариялайды..
Суретті түсірген – Жұмабай Мұсабек
Жетісу кейінгі жылдары инвестиция тарту мен өндірісті өркендету бағытында қарқынды дамып келеді. Әсіресе «Қорғас – Шығыс қақпасы» арнайы экономикалық аймағы елімізді ғана емес, тұтас Орталық Азияның маңызды логистикалық орталығына айналды. Еуропа мен Азияны жалғайтын стратегиялық дәліздің бойында орналасқан аймақ енді тек жүк тасымалдайтын торап емес. Ол жоғары технологиялар мен заманауи өндірістер шоғырланатын жаңа индустриялық орталық ретінде бағалы.
Осы бағыттағы маңызды жаңалықтардың бірі – аталған аймақта инновациялық технологияларды енгізуге және зияткерлік өндірісті өркендетуге бағытталған ауқымды индустриялық парк салу жөніндегі меморандумға қол қойылуы. Жетісу облысының әкімдігі мен қытайлық «Polyking Newhorizons Technology Industry Co., Ltd.» компаниясы арасында жасалған келісім өңірдің инвестициялық әлеуетін жаңа деңгейге көтереді. Маңызды құжаттың мәні зор. Меморандумға компанияның бас директоры Ли Канчао мен облыс әкімінің орынбасары Әсет Қанағатов қол қойды. Оның айтуынша, бұл келісім – өңірдің инвестициялық тартымдылығын арттырудағы жаңа кезең.
«Аталған құжатқа қол қою – «Қорғас – Шығыс қақпасы» арнайы экономикалық аймағы аумағында халықаралық деңгейдегі жаңа индустриялық алаң қалыптастырудағы маңызды қадам. Жобаны іске асыру Жетісу облысының өнеркәсіптік әлеуетін дамытуға, тікелей шетелдік инвестицияларды тартуға, жаңа жұмыс орындарын құруға, заманауи өндірістік технологияларды енгізуге және Қазақстан мен Қытай арасындағы халықаралық инвестициялық ынтымақтастықты нығайтуға ықпал етеді», деді Ә.Қанағатов.
Бүгінде әлем экономикасында өндірісті цифрландыру, жасанды интеллектіні енгізу, энергия тиімділігін арттыру және жоғары технологиялы өндірістерді дамыту негізгі басымдыққа айналып отыр. Қазақстан да осы үдерістен шет қалмай, халықаралық инвесторлармен әріптестікті нығайту арқылы өндірісті жаңғыртуға ерекше мән беруде. Ал Қорғас осы міндетті жүзеге асыратын ең қолайлы алаңдардың бірі болып саналады.
Жоба аясында аумағы мың гектарды қамтитын заманауи индустриялық парк салынады. Оның құрамында табиғи газды негізгі шикізат ретінде пайдаланатын интеграцияланған энергетикалық станса бой көтермек. Бұл кешен бір мезгілде электр энергиясын өндіріп, жылумен қамтамасыз етіп, сұйытылған табиғи газ шығарады. Тәулігіне 2 млн текше метрге дейін табиғи газ тұтынатын өндіріс өңірдің энергетикалық қауіпсіздігін күшейтпек. Оған қоса жаңа кәсіпорындардың тұрақты жұмыс істеуіне де мүмкіндік береді.
«Бұл – қарапайым өндіріс орны емес, жоғары технология мен инновацияға негізделген жаңа индустриялық экожүйе. Мұнда болашақта заманауи өндірістер ашылып, цифрлық технологиялар енгізіліп, халықаралық деңгейдегі кәсіпорындар шоғырлануы мүмкін. Мұндай жобалар еліміздің өнеркәсіп құрылымын жаңғыртып қана қоймай, жаңа технологиялардың келуіне, отандық мамандардың тәжірибе жинақтауына және экспорттық әлеуеттің артуына жол ашады», дейді Ә.Қанағатов.
Өз кезегінде инвестор компания барлық қажетті инвестицияны тартып, жобалық-сметалық құжаттаманы әзірлеуді және индустриялық парк пен энергетикалық инфрақұрылым нысандарының құрылысын жүргізуді мойнына алады. Ал облыс әкімдігі инженерлік инфрақұрылыммен қамтамасыз ету, газбен жабдықтау және инвестициялық жобаны іске асырудың барлық кезеңінде жан-жақты қолдау көрсетеді. «Polyking Newhorizons Technology Industry Co., Ltd.» компаниясының бас директоры Ли Канчао да бұл жобаның екі ел арасындағы ынтымақтастықты жаңа деңгейге көтеретініне сенім білдірді.
«Қорғас – Шығыс қақпасы» арнайы экономикалық аймағы – өзінің географиялық орналасуы мен даму әлеуеті жағынан халықаралық өндірістерді орналастыруға өте қолайлы алаң. Біз Жетісу облысымен ұзақмерзімді әріптестік орнатуға мүдделіміз және бұл индустриялық парк жаңа технологияларды енгізуге, тиімді өндіріс құруға әрі өңір экономикасының дамуына өз үлесін қосады деп сенеміз», деді Ли Канчао.
Кейінгі жылдары Жетісуда инвестициялық климатты жақсартуға бағытталған жұмыс жүйелі түрде жүргізіліп жатыр. Өңірде өндірістік кәсіпорындар ашылып, жаңартылатын энергия көздері, агроөнеркәсіп, логистика және өңдеу өнеркәсібі бағытында ірі жобалар жүзеге асырылып келеді. Соның нәтижесінде шетелдік инвесторлардың қызығушылығы артып, жаңа өндірістер іске қосылып, жүздеген жұмыс орны құрылды.
Ал осы өзгерістердің жүрегіне айналған Қорғас – бүгінде еліміздің халықаралық экономикалық байланыстарының басты қақпаларының бірі. Қытаймен шекарадағы ауқымды аймақ тек сауда орталығы ғана емес, Еуразия кеңістігіндегі көлік-логистикалық дәліздің маңызды буыны ретінде қалыптасты. Енді оған жоғары технологиялы индустриялық өндірістердің қосылуы өңір экономикасына тың серпін бермек.
Маңызды меморандумды жай ғана инвестициялық келісім ретінде қабылдамау керек. Бұл – еліміздің индустриялық дамуына бағытталған ұзақмерзімді стратегиялық шешімі. Мұндай жобалар арқылы Жетісу өңірі жаңа технологиялардың ордасына, халықаралық өндірістердің сенімді серіктесіне айналады.Сондай-ақ Орталық Азиядағы заманауи индустрияның маңызды орталықтарының бірі болмақ.
Жетісу облысы