Qazaq24.com, Inform.KZ дереккөзінен алынған ақпаратқа сүйене отырып жаңалық таратады..
Қостанай облыстық санитариялық-эпидемиологиялық бақылау департаментінің ресми сауалға берген жауабына сәйкес, ауру фактісі бойынша эпидемиологиялық тексеру жүргізілген. Мектепте байланыста болған адамдар шеңбері анықталып, қорытынды дезинфекция жасалған.
Жалпы саны 441 адам тексеруден өтті, оның 339-ы – оқушылар. Барлық байланыста болған тұлғалар Манту сынамасы, рентгенография және флюорографияны қоса алғанда, қажетті диагностикалық зерттеулерден өткен.
Ведомство мәліметіне сүйенсек, байланыста болғандардың арасында ауру жұқтыру жағдайлары тіркелмеген.
– Инфекция көзі болған асхана қызметкері ауруханаға жатқызылып, ем қабылдап жатыр. Департаментте науқасты дер кезінде оқшаулау және санитариялық талаптарды сақтау ұйымдасқан ұжымдарда инфекцияның таралу қаупін төмен деңгейде ұстайды, – делінген департаменттің ресми хабарламасында.
Сонымен қатар тексеру барысында қызметкердің міндетті медициналық тексерусіз жұмысқа жіберілгені анықталған. Осыған байланысты жеке кәсіпкерге қатысты әкімшілік шаралар қабылданды.
Мамандардың айтуынша, өңірде байланыста болған адамдарға медициналық бақылау жалғасып жатыр.
Жалпы 2026 жылдың басынан бері Қостанай облысында туберкулездің 66 жағдайы тіркелген. Оның ішінде 14 жасқа дейінгі балалар арасында – 3, жасөспірімдер арасында – 2 жағдай бар. 2025 жылдың осы кезеңімен салыстырғанда сырқаттанушылық бір жағдайға азайған.
Биылғы алғашқы үш айда жалпы білім беретін мектептерде туберкулездің 6 жағдайы анықталған: 2-еуі қызметкерлер арасында, 4-еуі оқушылар арасында. 2025 жылы мектептерде 17 жағдай, ал бір балабақшада 1 жағдай тіркелген. Ауру жұқтырғандардың жартысы – техникалық қызметкерлер.
Департамент басшылығы әрбір жағдай бойынша инфекцияның таралуына жол бермеу үшін эпидемияға қарсы және профилактикалық шаралардың толық кешені жүргізілетінін мәлімдеді.
Туберкулездің алдын алудың негізгі жолдары ретінде ауруды ерте анықтау, тәуекел тобындағы балаларға жыл сайын туберкулиндік диагностика жүргізу және ересек тұрғындарды флюорографиялық тексеруден өткізу көрсетілді.
Айта кетейік, наурыз айында Қостанайдағы мектептен туберкулез шықты деген хабарламадан кейін тергеу басталғанын жаздық.