Qazaq24.com, Aikyn.KZ дереккөзінен алынған мәліметтерге сүйене отырып ақпарат бөліседі..
2026 жылдың 1 мамырындағы жағдайға сәйкес, Қостанай облысында 4 мыңға жуық мүгедектігі бар бала тұрады, оның 1 528-і психоневрологиялық патологиясы бар және 200-ге жуық балада тірек-қимыл аппараты бұзылған. Жалпы,
1 285 балаға оңалту емі ұсынылған. Бұдан бұрын облыста балаларға арналған жеке сауықтыру орталығы болмады, тек ересектерге арналған облыстық орталықта балалар бөлімі жұмыс істеген. Мұндағы 20 төсек орынның өңірдегі қажеттілікті толық өтей алмағанын айтпаса да, түсінікті жайт. Бүгінде жаңа орталық өңір балаларын қуантып, бір мезетте 60 балаға, ал жылына 900 балаға реабилитациялық қолдау көрсетуге қауқарлы. Оңалту орталығы 1,5 жастан 18 жасқа дейінгі балаларға ақысыз негізде көмек береді. Медициналық мекемеге барған кезімізде, балаларды емдеудің бесінші легі жүріп жатты. Облыстағы әлеуметтік мекемелердің қызметін үйлестіру бөлімінің бас маманы Гүлнұр Жолдыбайқызы орталық жұмысының артықшылықтарын егжей-тегжейлі түсіндіріп берді.
– Орталық Қостанай облысының мүгедектігі бар, психоневрологиялық ауытқуға ұшыраған және тірек-қимыл аппаратына зақым келген балаларға ақысыз негізде медициналық көмек береді. Балалардың ата-анасы, заңды тұлғаларының да бірге орналасуына мүмкіндік қарастырылған. Орталықта 7 корпус бар, 3,4-корпус жатын бөлмелермен қамтылған, 5,6 және 7-корпустарда әртүрлі емдік шара жүргізіледі, – дейді Г.Жолдыбайқызы.
Ерекше айтарлығы, орталықтың жоғары сапада қызмет көрсетуі үшін «Қазақстан халқына» қоғамдық қоры оңалту-сауықтыруға арналған құрал-жабдықтар мен жиһаздарды алуға 1,037 миллиард теңге қаражат бөлген. Қазір де бірнеше құрылғы кезең-кезеңімен жеткізіліп жатыр. Бүгінге дейін жалпы құны 746,3 миллион теңге болатын арнайы сабақтар өткізуге қажетті оңалту орындықтары, интерактив үстел, «Атлант» нейроортопедиялық костюмдері, сонымен қатар иммерсиялық, бальнеологиялық ванна, тұз, сенсорлық, шунгит бөлмелері, «Локомат» роботтық оңалту кешені орнатылды. Бұрын резиденция аумағында тереңдігі 1,5 метрлік бассейн болса, қазір стандартқа сай лайықталып, қайта қалпына келтірілген 1 метрлік жаңа бассейн пайдаға асып тұр. Тағы бір қуанарлық жағдай, ем алу ұзақтығы 14 күннен 21 күнге дейін ұзарды.
– Балалар жылына стандартқа сай 1 рет ем-дом алуға құқылы, бірақ орталығымызда бос орындар шықса, екінші мәрте келуге болады. Мысалы, кейбір ата-аналар белгілі бір себептерге байланысты баланы әкеле алмауы, алыс жерден жете алмай қалуы да мүмкін, сондай кезде екінші рет ем алуға болады, – дейді Г.Жолдыбайқызы.
Маманның айтуынша, орталықта бүлдіршіндерге қуаныш сыйлайтын ерекше костюм бар, арбамен қозғалатын балалар «Атлант» нейроортопедиялық костюмін киген сәтте өз аяғымен нық тұрып, тік көтеріліп жүруге мүмкіндік туады. Ал ата-ана үшін баланың шаттанған жүзін көргеннен артық бақыт жоқ. Біз баласын екінші мәрте ем-домға әкелген ана – Жайнагүл Бажекеевамен тілдескен едік.
– Балам Естаев Әмірге БЦП диагнозы қойылды, қазір 11 жаста. Баламның күтімі үшін Наурызым ауданынан Қостанайға көшіп келгенімізге 3 жылға жуықтады. Бұдан бұрын облыстық балалар бөлімінде ем алдық, Астанаға да бардық, өзге де оңалту орталықтарынан көмек алдық, дегенмен жаңа орталықтың емдік әсері тиіп жатқанын байқадым. Баламда бір ұмтылыс пайда болды, арнайы сабақтарға өзі қатысқысы келіп, қатты қуанады, АФК, логопед қызметі көңілімізден шықты. «Локомат» десе қатты қуанады, костюмді кигендегі қуанышын көрсеңіз, суды жақсы көреді, – дейді Жайнагүл ханым.
Ол орталық ашылғанын ести сала алғашқылардың бірі болып ұлын емге әкелген, мүмкіндік туса, күзде де келуге ниетті екенін жеткізді.
Орталықта бұдан бөлек, механотерапия – қозғалыс функцияларын қалпына келтіруге арналған кабинет, эрготерапия – киіну, жуыну, баспалдақпен көтерілу сияқты баланың күнделікті дағдыларын қалыптастыруға бағытталған бөлме жұмыс істейді. Орталық басшысы Жасұлан Айбаұлының айтуынша, тамыз айында ағаш және қыш шеберханалары да жұмысын бастайды. Бұл мүмкіндіктер әлі талай баланың жүзіне қуаныш сыйлары анық...
Айсұлу СЪЕЗХАН