Azh.KZ парақшасындағы ақпаратқа сәйкес, Qazaq24.com хабар таратты..
Жылыой аудандық сотында «Ниет LTD» ЖШС директорының міндетін атқарушы Серік Есенбаевқа қатысты қылмыстық іс қаралып жатыр. Оған өнеркәсіптік және өрт қауіпсіздігі талаптарын бұзды деген айып тағылып отыр. Тергеу нұсқасы бойынша, бұл заң бұзушылық салдарынан Құлсарыдағы автогаз құю станциясы жарылып, екі адам қаза тапты және он екі адам жарақат алды.
Қайғылы жағдай 2025 жылдың 30 мамырында кешке Құлсары қаласындағы «Ниет №3» АГЗС аумағында болған. Автоцистернадан сұйытылған газды сыйымдылығы 25 текше метрлік жер үсті резервуарына құю кезінде газ-ауа қоспасы жарылды. Жарылыстан кейін өрт басталды.
Оқиға салдарынан станция жүргізушісі Беркін Ибетов пен кассир Мирамгүл Сарбасова қаза тапты. Тағы он екі адам әртүрлі дәрежедегі дене жарақаттарын алған. Зардап шеккендердің арасында ересектер де, балалар да, соның ішінде үш жасар бала бар.
Тергеу мәліметінше, қайғылы жағдайға қауіпсіздік талаптары сақталмаған көптеген кемшіліктер себеп болған. Станция жобасында сыйымдылығы 10 текше метрлік резервуарды пайдалану көзделген. Алайда 2024 жылы басшылық қажетті рұқсат құжаттарынсыз, қауіпті өндірістік нысанды мемлекеттік тіркеуден өткізбей және оны пайдалануға тиісті лицензиясыз сыйымдылығы 25 текше метрлік резервуарды сатып алып, орнатқан.
Бұдан бөлек, айыптау тарапы көрсеткендей заңнаманың тікелей талаптарына қарамастан, нысанда өрт қауіпсіздігін қамтамасыз етуге жауапты тұлға тағайындалмаған. Тергеу нұсқасы бойынша, Серік Есенбаев кәсіпорын басшысының міндетін атқара отырып, өнеркәсіптік және өрт қауіпсіздігі нормаларының сақталуын қамтамасыз етуге міндетті болған, бірақ оны жасамаған.
Жарылыс пен өрт салдарынан көршілес ғимараттар мен автокөліктер зақымдалған. Бірнеше көлік иесіне материалдық шығын келтірілді. Сондай-ақ Б. Өткелбаев көшесіндегі тұрғын үй мен «Дельфин-бассейн» коммерциялық нысаны зақымданған.
Сот-медициналық сараптамасы жүргізуші Беркін Ибетовтің жарылыс сәтінде алған көптеген ауыр жарақаттардан қаза тапқанын анықтады. Кассир Мирамгүл Сарбасованың өліміне иіс тию және жанатын өнімдерден улану себеп болған.
Жүргізілген сараптамалар зардап шеккендерде әртүрлі дәрежедегі күйіктің бар екенін де растады. Олардың бір бөлігінің денсаулығына жеңіл зиян, басқаларына орташа ауырлықтағы зиян келтірілген.
Тергеу Серік Есенбаевтың әрекетін Қазақстан Республикасы Қылмыстық кодексінің 281-бабы 3-бөлігі — «Абайсызда екі немесе одан да көп адамның өліміне және өзге де ауыр зардаптарға әкеп соққан жарылыс қаупi бар объектiлерде қауiпсiздiк қағидаларын бұзу» бойынша саралады.
Қаза тапқан адамның туыстары болған оқиғамен әлі де келісе алмайтынын және соттың әділ шешімінен үміттенетінін мәлімдеді.
Отбасының айтуынша, қаза тапқан Беркін Ибетов «Олжа» АҚ-да жұмыс істеген, бірақ сот талқылауы барысында компания, олардың пікірінше, шығынды өтеу жауапкершілігінен іс жүзінде босатылып жатыр.
— Ол «Ниет» ЖШС-де емес, «Олжа» АҚ-да жұмыс істеді. Бірақ қазір сот жауапкершілікті тек «Ниет» компаниясы мойнына алуы керек деп санап, «Олжаны» төлемдерден босатып жатыр. Ал ол «Олжаның» қызметкері болған ед., — дейді туыстары.
Отбасына марқұммен қоштасу ерекше ауыр тиген. Жарылыстан кейін ер адамның денесі қатты зақымдалған, сондықтан туыстарына табылған сүйек қалдықтарын бірнеше рет жерлеуге тура келген.
— Біз оны бес рет жерледік. ДНҚ сараптамаларынан кейін мәйіттің жаңа бөліктері табылып жатты және әр жерлеген сайын бізге бұл қайғыны қайтадан бастан кешуге тура келді, — дейді марқұмның жақындары.
Соттағы тағы бір даулы мәселе қайғылы жағдайдан кейін отбасына көрсетілген қаржылай көмек мәселесі болды. Туыстары жауапкер өкілдерінің 60 миллион теңге төленгені туралы мәлімдегенін, бірақ бұл соманың шындыққа жанаспайтынын айтады.
— Сотта бізге 60 миллион теңгенің чегін көрсетіп, бұл ақша біздің отбасымызға көмек ретінде жұмсалды деп мәлімдеді. Бірақ біз банк аударымдарын көрсетіп, бізге тікелей 10 миллион теңгеге жуық қаражат аударылғанын дәлелдедік. Бұл сомаға жаназа шығындары, садақаға шатыр құру, тамақтану, үйді жөндеу және басқа да ұйымдастыру мәселелері кірді, — дейді туыстары.
Олардың айтуынша, сотта айтылған сомаға Fresco ғимаратын қалпына келтіру шығындары және жарылыс орнының жанынан өтіп бара жатып күйік алған басқа да зардап шеккендерге жасалған төлемдер қосылып кеткен.
— Бұл шығындардың барлығын неге екені белгісіз біздің отбасымызға жасалған көмек ретінде көрсеткісі келеді. Бұл шындыққа сәйкес келмейді, — деп есептейді туыстары.
Айгүл МАНСҰРОВА
Бүгін, 16:06