Құмар Ақсақалов Тоқаевтың үмітін ақтамады

Жоғары аудиторлық палата Қостанай облысы бойынша мемлекеттік ресурстарды пайдалану тиімділігіне жүргізілген аудиттің қорытындысын шығарды. Аймақты әкім Құмар Ақсақалов басқарады, деп хабарлайды Arasha.kz.

Аудиторлар өңірдің жалпы өңірлік өнімі артқанын атап өткен. Алайда әлеуметтік-экономикалық даму тұрақсыз сипатта екені белгілі болды. Атқарушы органдар деңгейінде басқару мен жоспарлауда жүйелі кемшіліктер анықталған.

2020-2024 жылдар аралығында жергілікті бюджет кірісі 75 пайызға өскен. Соған қарамастан, меншікті кірістердің үлесі небәрі 29 пайыздан 36,1 пайызға дейін ғана артқан.

Сондай-ақ аудит барысында 19 миллиард теңге игерілмеген бос қаражат бола тұра, 30 миллиард теңге көлемінде қарыз алынғаны тіркелген. Бұл шығындарды жоспарлау мен қарыз жүктемесі арасындағы үйлесімсіздікті көрсетеді.

Тікелей шетелдік инвестициялар ағыны әлі де төмен деңгейде қалып отыр. 2025 жылға жоспарланған жалпы құны 188 миллиард теңге болатын 8 инвестициялық жобаның 6-уы әлі пайдалануға берілмеген.

Өңірді дамыту бағдарламасын жүзеге асыру барысында жыл сайын 12-ден 164-ке дейін инвестициялық жоба тізімнен алынып отырғаны анықталды. Сонымен қатар бірқатар нысандардың құрылысы кезінде жобалық-сметалық құжаттамада жүйелі бұзушылықтар тіркелген. Бұл өз кезегінде нысандарды уақытында пайдалануға беруге кедергі келтіріп, кей жағдайда құрылыс барысында түзетулер енгізуді талап етеді.

11 миллиард теңге көлемінде 352 кәсіпкерлік субъектісіне көрсетілген мемлекеттік қолдау тиімсіз болып шықты: олардың 179-ы қызметін тоқтатса, 168 кәсіпорын жұмыс орындарын ашу жөніндегі міндеттемелерін орындамаған. Сондай-ақ қаржылық тұрғыдан тұрақты бизнесті жасырын субсидиялау фактілері анықталған. Бұл бәсекелестік қағидаттарын бұзып, әлеуметтік-кәсіпкерлік корпорациялардың (ӘКК) тиімділігін төмендетеді.

Өңірде жол құрылысының сапасына тиісті бақылау жоқ. 12 нысанды тексеру барысында асфальтбетон жабынының шөгуі мен бұзылуы сияқты ақаулар анықталған. Мұндай кемшіліктер тіпті бұрын пайдалануға берілген жол учаскелерінде де кездеседі.

Агроөнеркәсіптік кешен өңір экономикасының негізгі салаларының бірі болғанымен, оның дамуы тұрақсыз күйде қалып отыр. 2022 жылдан бері ауыл шаруашылығы өнімдерінің жалпы көлемі төмендеп, мал басы азайған. Сонымен қатар жабылған ауыл шаруашылығы кәсіпорындарының саны артқан.

Мемлекеттік сатып алу саласында 12 миллиард теңгеге жуық заңбұзушылықтар тіркелді. Оның ішінде талаптарға сәйкес келмейтін компаниялардың жеңімпаз деп танылуы, "ерекше тәртіпті" негізсіз қолдану және төтенше жағдайды сылтау етіп бір көзден сатып алу фактілері анықталған.

Дәрігерлік амбулаториялар салу кезінде медициналық жабдықтардың құны шамамен 200 миллион теңгеге негізсіз өсірілгені белгілі болды. Кейбір құрал-жабдықтар жобалық-сметалық құжаттарда көрсетілген бағадан 18-46 есе арзан болғанына қарамастан, жоғары бағамен сатып алынған. Ал баға қалыптастыруда банкрот деп танылған компанияның прайс-парақтары негізге алынған.